चितवनका दुग्ध किसानद्वारा आन्दोलनको घोषणा

नमस्ते चितवन

बिहिबार, पुष २६, २०८० मा प्रकाशित

दूध बिक्री हुन गाह्रो हुँदै गएको र बिक्री भएको दूधको भुक्तानी नपाएको विषयमा संघीय र प्रदेश सरकारका कृषि मन्त्रीलाई पटक–पटक कुरा राखे पनि सुनुवाइ नभएको भन्दै चितवनका दुग्ध किसानले आन्दोलनको घोषणा गरेका छन् । बुधबार भरतपुरमा पत्रकार सम्मेलन गरी जिल्ला दुग्ध उत्पादक सहकारी संघले आन्दोलनमा जाने निर्णय गरेको दुग्ध उत्पादक सहकारी संघका चितवनका अध्यक्ष किशोर बगालेले बताएका छन्।

भारतीय सस्तो उत्पादनमा दुग्ध खुलमखुला नेपाल भित्रिएको र रात्रिबसमा थैलामा राखेर नौनी घिउ आएको आफूहरूले पत्ता लगाएको दाबी गर्दै किसानले आन्दोलन गर्ने घोषणा गरेका छन् ।

संघले पुस २९ गते भरतपुरमा विरोध प्रदर्शन गर्ने कार्यक्रम तय गरेको छ । त्यसैगरी, माघ १ गते चितवनको भेटेरिनरी अस्पताल तथा पशु सेवा केन्द्रमा तालाबन्दी गर्ने र माघ २ गते संघीय र प्रदेश कृषि मन्त्रीको पुत्ला दहन गर्ने कार्यक्रम तय भएको संघका सचिव कल्याण अधिकारीले बताएका छन्। ‘त्यसपछि पनि सुनुवाइ नभए माघ ३ गते थप आन्दोलनका कार्यक्रम घोषणा गर्ने पत्रकार सम्मलेलनमा जानकारी दिएका छन् ।

किसानहरुले भने, ‘यस्ता कुरा सरकारले खै रोकेको, ‘देशमा दूध र अन्य दुग्ध पदार्थ कति चाहिने हो, कति उत्पादन भएको छ, पुगअपुग या बढी पो छ कि, सरकारले हेरेर ठोस निर्णय लिनुपर्ने हैन ? दूधमा प्रदेश सरकारले दिने अनुदान कटौती गर्दै लगेको, बिमा र सहुलियत ऋण पाएके छैन ।