ज्यान मार्ने धम्की दिएर फिरौती मागगर्ने तीन युवा पक्राउ

नमस्ते चितवन

बुधबार, माघ ०३, २०८० मा प्रकाशित

ज्यान मार्ने धम्की दिएर १५ लाख फिरौती रकम माग गर्ने तीन युवालाई चितवन प्रहरीले पक्राउ गरेको छ ।

भरतपुर–१ मा व्यवसाय गरेर बसेका करन गुप्तालाई बारम्बार एनसेलको विभिन्न नम्बरबाट फोन गरी १५ लाख रकम फिरौति माग गर्ने युवालाई प्रहरीले पक्राउ गरेको हो । प्रहरीका अनुसार पक्राउ पर्नेमा भरतपुर महानगरपालिका–२१ बस्ने २७ वर्षिय सरोज सुनार, भरतपुर–१ बस्ने २६ वर्षिय दिपक वि.क. र भरतपुर– २६ बस्ने २५ वर्षिय सागर वि.क. रहेका छन् ।

उनीहरुले निरन्तर धम्की दिन थालेपछि गुप्ताले जिल्ला प्रहरी कार्यालय चितवनमा उजरी दिएका थिए । प्रहरी निरीक्षक उमाशंकर प्रसाद शाहको कमाण्डमा खटेको विशेष टोलीले उनीहरुलाई पक्राउ गरेको जिल्ला प्रहरी कार्यालय चितवनका प्रवक्ता श्रीराम भण्डारीले जानकारी दिएका छन् ।

उनीहरुलाई फिरौति रकम लिन आएको अवस्थामा प्रहरीले पक्राउ गरेको हो । पक्राउ परेको उनिहरुलाई चितवन जिल्ला अदालतबाट आपराधिक षड्यन्त्र मुद्धा शिर्षकमा म्याद थप गरि आवश्यक अनुसन्धान भईरहेको चितवन प्रहरीजनाएको छ ।