फिल्म सेन्सर कि ग्रेडिङ ? हेटौडाँमा व्यापक बहस

नमस्ते चितवन

सोमबार, फागुन ०७, २०८० मा प्रकाशित

पत्रकारको प्रथम राष्ट्रिय भेला तथा चलचित्र पत्रकारिता कार्यशालामा आज अन्तरसंवाद गरिएको छ । बागमती प्रदेशको राजधानी हेटौंडामा आइतबारदेखि सुरु भएको कार्यशालाको आज दोस्रो दिन, चार सेसनमा ‘फिल्म सेन्सर कि ग्रेडिङ ?’ भन्ने विषयमा अन्तरसवांद गरिएको हो।

अन्तरसवांदमा बोल्दै बोर्डका पूर्व अध्यक्ष दयाराम दाहालले सेन्सर बोर्डका कारण चलचित्र विकास बोर्डले अपजस खाइरहने बताउनु भयो । ‘सेन्सर बोर्डलाई या त बोडकै अधिनमा ल्याउनु पर्यो, यात सेन्सर बोर्डलाई सूचना तथा सञ्चार मन्त्रालयभन्दा बाहिर निकाल्नुपर्यो’, उहाँले भन्नुभयो । उहाँले ‘सेन्सर बोर्डलाई प्रमाणिकरण बोर्ड नाम राख्न र ग्रेडिङको काम गर्न जोड दिनुभयो ।

यस्तै फिल्म निर्देशक मनोज पण्डितले राज्यको दायित्व जनता र दर्शकसँग हुनुपर्ने बताउनु भयो । ‘राज्यको दायित्व फिल्मकर्मीलाई प्रोत्साहन गर्ने हो, लठ्ठी बोकेर थर्काउने होइन, उहाँले भन्नुभयो । सेन्सर बोर्डले सार्वजनिक गरेको पछिल्लो २० बुँदे कार्यविधि प्रति लक्षित गर्दै उहाँले विधि प्रति आपत्ति जनाउनु भयो । उहाँले फिल्मकर्मीलाई सेल्फ सेन्सरसिपको अधिकार दिनुपर्नेमा जोड दिनुभयो ।

यसैगरि बोर्डका सदस्य रविचन्द्र अधिकारीले विकास बोर्डले सेन्सरका लागि सिफारिस दिने गरे पनि सेन्सर पछि त्यसको गाली बोर्डले खाने गरेको स्मरण गर्नु भयो । उहाँले सेन्सर बोर्डका सदस्यलाई तीनदेखि पाँच वर्षसम्म तालिम लिएर योग्य बनाई बोर्डमा नियुक्ति दिनुपर्ने बताउनु भयो ।

सेन्सर बोर्डका सदस्य ऋषिराज आचार्यले २०२६ सालमा बनेको ऐनमा टेकेर चलचित्र हिडिँ रहेकाले त्यसैमा रहेर नयाँ बुँदा थपिएको भन्दै सेन्सर बोर्डको बचाउ गर्नुभयो । उहाँले अहिलेको अवस्थामा बनाइएका बुँदालाई परिवर्तन गर्न नसकिने बताउनु भयो ।

पत्रकार सञ्जोग बस्यालले सहजीकरण गरेको अन्तरसंवादमा चलचित्र विकास बोर्डका पूर्व अध्यक्ष दयाराम दाहाल, फिल्म निर्देशक मनोज पण्डित, सेन्सर बोर्डका सदस्य निश्चल बस्नेत र चलचित्र विकास बोर्डका सदस्य रवि अधिकारी वक्ता रहनु भएको थियो।

चलचित्र पत्रकार संघ नेपाल, केन्द्रीय कार्यसमितिको आयोजना र चलचित्र पत्रकार संघ नेपाल, मकवानपुर शाखाको सह–व्यवस्थापनमा चलचित्र पत्रकारको प्रथम राष्ट्रिय भेला तथा चलचित्र पत्रकारिता कार्यशाला हेटौँडामा हिजोदेखि सुरु भएको हो । कार्यशालामा आज अन्तरसंवाद गरिएको छ ।

सोमबार, फागुन ०७, २०८० मा प्रकाशित