‘लन्डन टु पेरिस’ को ‘खुला आकाश’ गीत सार्वजनिक (भिडिओ)

नमस्ते चितवन

मङ्गलबार, चैत २७, २०८० मा प्रकाशित

घनश्याम लामिछाने निर्देशित फिल्म ‘लन्डन टु पेरिस’ को गीत सार्वजनिक गरिएको छ।

मंगलबार ओएसआर डिजिटल युट्युब च्यानलमार्फत फिल्ममा समावेश ‘खुला आकाश’ बोलको गीत सार्वजनिक गरिएको हो। हर्कुलेस बस्नेतको स्वर, शब्द तथा संगीत रहेको गीतमा अभिनेत्री साम्राज्ञी राज्यलक्ष्मी शाह र अभिनेता निश्चल खड्कालाई रोमान्टिक रूपमा प्रस्तुत गरिएको छ।

फिल्ममा साम्राज्ञी र निश्चलसँगै कविर खड्का, गरिमा शर्मा, रूष्मा थापा, मनिष श्रेष्ठ, मनिष गान्धीलगायत कलाकारको अभिनय छ। निश्चलले यही फिल्मबाट अभिनयमा डेब्यू गर्न लागेका हुन्।

एबी इन्टरनेशनलको प्रस्तुति रहेको फिल्ममा गौतम प्रोडक्शन र अर्चिड भेस फिल्म्स लिमिटेडको निर्माण सहकार्य रहेको छ। फिल्मको कथा, पटकथा र संवाद प्रदीप भारद्धाजले लेखेका हुन्। फिल्ममा आरोन बस्नेत, एरियाना बस्नेत र परी राना निर्माताका रूपमा रहेका छन्।

अभेद परव र कुनाल कदमले छायांकन गरेको फिल्मलाई शजु चन्दनले सम्पादन गरेका छन्।

फिल्मले ट्राभल लभस्टोरीको कथा पेस गर्छ। सनिश खकुरेल र अजित केआर थापा फिल्मको सह-निर्माता हुन् भने अंकित गौतम, सुरज कुँवर, विजय भन्डारी यसका कार्यकारी निर्माता हुन्।

यो फिल्म जेठ २५ गतेदेखि प्रदर्शन हुनेछ।