गठबन्धनका साझा उम्मेदवार परमेश्वर खनालले सुरु गरे चुनावी अभियान

नमस्ते चितवन

सोमबार, बैशाख १९, २०७९ मा प्रकाशित

बैशाख १९ , भरतपुर ।भरतपुर वडा नं. १० का गठबन्धनका अध्यक्ष पदका साझा उम्मेदवार परमेश्वर खनाल आफ्नो वडामा रहेका सबै पार्टीका बृद्ध तथा मान्यजनहरुसँग आशीर्वाद लिएर चुनावी अभियानमा होमिएका छन्।

‘गठबन्धनसँगै एमाले राप्रपाका मान्यजनहरुको पनि मैले आशीर्वाद पाएँ, तपाईंको जित निश्चित छ अगाडि बढ्नुस्’, वडाबासीले आफूलाई आशीर्वाद दिएको सुनाउँदै उनले भने, ‘हामी तपाईंको साथमा छौँ भन्नुभएको छ।’

भरतपुरको विशालचोकमा रहेको प्रतीक्षालयमा बसेका ८७ वर्षीय वृद्ध मोहराज शर्माले यो पटक कुनै दलभन्दा पनि व्यक्ति हेरेर मतदान गर्ने सोचमा मतदाता रहेको भन्दा उनी फुरुंग परे।शर्माले ढाडस दिँदै खनाललाई भने, ‘तपाईं कत्ति पनि नआत्तिनुस्, हामी तपाईलाई जिताउँछौ तपाईंलार्इ मेरो आशीर्वाद छ।’

भरतपुर १० का ८० वर्षीय डम्बर कुमारी पन्डितले अहिलेसम्म कसैले नगरेको उदाहरणीय काम गरेर देखाउन सकेस् भन्दै शिरमा हात राखेर आशीर्वाद दिएका थिए। अध्यक्ष पदका उम्मेदवार खनालले वडाबासीहरुको आशीर्वादले नै आफूलाई चुनाव जित्न मद्दत पुग्ने बताए।

‘आज मैले धेरै आमाबुवाहरुको आशीर्वाद ग्रहण गरेँ, यसले मलाइ थप ऊर्जा दिएको छ’, उनले भने। वडाको विकासका लागि आफू प्रतिबद्ध रहेको समेत उनले बताएका छन्।उनले महानगरमा सडक चौडा बनाउँदै जाँदा प्रतीक्षालयहरु विस्थापित हुने हुँदा त्यसमा आफूले पञ्च वर्षीय योजना बनाएर प्रतीक्षालयहरुको संरक्षण गर्ने आश्वासन दिए।युवादेखि सबै समूहको समस्यालाई समाधान गर्दै वडालाई व्यवस्थित र नमूना बनाउने अभियानमा आफू लागि पर्ने उनको प्रतिबद्धता छ। घरदैलो कार्यक्रम लगातार चलिरहने खनालले बताए।