शोभित बस्नेत निर्देशित फिल्म ‘पीआर’ को ट्रेलर सार्वजनिक

नमस्ते चितवन

मङ्गलबार, मङि्सर १६, २०८२ मा प्रकाशित

काठमाडौं, मंसिर १६
निर्देशक शोभित बस्नेत निर्देशित फिल्म ‘पीआर’ को ट्रेलर सार्वजनिक गरिएको छ। मंगलबार राजधानीमा आयोजित पत्रकार सम्मेलनमार्फत ३ मिनेट १ सेकेन्ड लामो ट्रेलर रिलिज गरिएको हो।

ट्रेलरमा नेपालबाट रिण खोजेर अष्ट्रेलिया पढ्न गएका युवाहरूको संघर्ष, परिवारको अपेक्षा र विदेशिएका युवाहरूले भोग्ने वास्तविकता छर्लङ्ग रूपमा देखाइएको छ। अष्ट्रेलियामा पुगेर पीआर लिने सपना बोकेका युवाहरूको यात्रा, उताको कडा परिस्थितिले सिर्जना गर्ने दबाब, र नेपालमा बसेका आमाबाबुले त्यसलाई नबुझ्दा उत्पन्न हुने तनावलाई निर्देशक बस्नेतले कथामा बुनेका छन्। ट्रेलर हेर्दा फिल्ममा लभस्टोरी, बिछोड र राष्ट्रप्रेमका भाव प्रमुख रूपमा प्रस्तुत हुने देखिन्छ।

मंसिर २६ गतेबाट अल नेपाल रिलिज हुन लागेको फिल्मको प्रचारका लागि अष्ट्रेलियामा बस्दै आएका आर ए सुरज पौडेल र विनिता कार्की नेपाल फर्किएका छन्। उनीहरूले चलचित्रमा मुख्य भूमिका निभाएका छन्। साथै, राजन कुँवर, पूजा चौधरी, आश्मा अधिकारी मस्तानी, विमला खत्री, गणेश बुढाथोकी, म्याक्स कृष्ण थापा र नवीन घायल पनि प्रमुख भूमिकामा छन्।

फिल्ममा नीर शाह, गौरी मल्ल, रविन्द्र खड्का, उत्तम केसी नेपाल र दिक्पाल कार्की विशेष भूमिकामा देखिनेछन्। ट्रेलरमा नीर शाहले बोलेको संवाद **‘नेपालीको जवानी अष्ट्रेलियामा लगानी’**ले दर्शकको मन छोनेमा निर्माण टिम विश्वस्त छ।

सलोन सलिना फिल्म्सको ब्यानरमा बनेको फिल्मको प्रस्तुति रञ्जित साह र सन्तोष तिवारीले गरेका हुन्। फिल्ममा लक्ष्मण सापकोटा र प्रदीप दाहालको लगानी रहेको छ। छायांकन सौरभ सायमी र सौरभ लामा, सम्पादन बन्दे प्रसाद, कथा–पटकथा गणेश बुढाथोकीको रहेको छ।

गीत–संगीततर्फ, फिल्मका गीतमा मानस राजको संगीत सुन्न सकिन्छ भने सनुप पौडेल र नीतु पुनको स्वर रहेको छ। फिल्मको कोरियोग्राफी रामजी लामिछानेले गरेका छन्। आर आर फिल्म्सले फिल्म वितरण गर्ने जनाएको छ।