‘बिगुल’ को टिजर सार्वजनिक, जेन्जी आन्दोलन र समसामयिक राजनीतिले बढायो कौतुहलता

नमस्ते चितवन

आइतबार, मङि्सर २८, २०८२ मा प्रकाशित

काठमाडौं, २८ मंसिर । माघ ९ गतेबाट प्रदर्शनमा आउन लागेको चलचित्र ‘बिगुल’ को टिजर आइतबार सार्वजनिक गरिएको छ । करिब सवा एक मिनेट लामो टिजरले चलचित्रप्रति दर्शकको उत्सुकता बढाएको छ ।

यसअघि सार्वजनिक फर्स्टलुक पोस्टरबाटै चर्चा बटुलिरहेको ‘बिगुल’ को टिजरमा देशको वर्तमान राजनीतिक अवस्था, देशप्रेम, सम्बन्ध र जिम्मेवारीसँगै पछिल्लो समय चर्चामा रहेको जेन्जी आन्दोलन को झल्को देखाइएको छ । टिजरले राजनीतिलाई केन्द्रमा राख्दै समाज र परिवारसँग जोडिएका विषयलाई समेट्ने संकेत गरेको छ ।

रमेश कोइरालाको निर्देशनमा बनेको चलचित्र ‘बिगुल’ को कथा तथा निर्माण दिनेश कोइरालाले गरेका हुन् । पछिल्लो समय एउटै प्रकृतिका विषयवस्तुमा आधारित चलचित्रहरू आइरहेका बेला ‘बिगुल’ ले भने राजनीति, समाज, परिवार, सम्बन्ध र मनोरञ्जनको सन्तुलित संयोजनमार्फत फरक प्रस्तुति दिने प्रयास गरेको निर्देशक कोइरालाले बताएका छन् ।

“फिल्मलाई केवल मनोरञ्जनका रूपमा मात्र नभई विचारका रूपमा पनि हेर्नुपर्छ भन्ने सोचका साथ ‘बिगुल’ निर्माण गरेका हौं,” यसअघि ‘मन मनमा’, ‘लीला’ र ‘नीरमाया’ निर्देशन गरिसकेका वरिष्ठ निर्देशक कोइराला भन्छन्, “हरेक नागरिकलाई आफ्नो देश र समाजप्रति जिम्मेवार बनाउन चलचित्रले महत्वपूर्ण भूमिका खेल्न सक्छ।”

कथाकार तथा निर्माता दिनेश कोइरालाले ‘बिगुल’ मा उठाइएका मुख्य मुद्दाहरू र अहिलेको जेन्जी पुस्ताले राखिरहेको माग, देश विकास र परिवर्तनप्रतिको चाहना आपसमा मेल खाने बताए । चलचित्रलाई जेन्जी आन्दोलनप्रति समर्पित गरिएको पनि निर्माण पक्षको भनाइ छ ।

‘बिगुल’ मा बेनीशा हमाल, नरेन खड्का, रमेश बुढाथोकी, नीर शाह, सरोज खनाल, हेमन्त बुढाथोकी, शिशिर वाङ्देल, विनोद न्यौपाने, जेएन घिमिरे, गीता अधिकारी, मीरा पण्डित र मानश्री शर्मालगायत कलाकारहरूको अभिनय रहेको छ ।

म्याग्नोलिया ग्रुपको ब्यानरमा निर्माण भएको चलचित्र कल्पना पौडेलको प्रस्तुति हो । पटकथा तथा संवाद प्रदीप भारद्वाज र मौनता श्रेष्ठले लेखेका छन् । शिब ढकालको छायांकन रहेको फिल्ममा कमल राई र कविराज गहतराजको नृत्य निर्देशन, एनभी महर्जनको द्वन्द्व निर्देशन तथा विश्वप्रकाश शर्मा, अर्जुन पोखरेल र मनोज चौलागाईंको संगीत रहेको छ । चलचित्रको सम्पादन तारा थापा ‘किम्भे’ ले गरेका हुन् ।

सूर्यकान्त कोइराला र महेश कोइराला सहनिर्माता रहेको ‘बिगुल’ को वितरण काफिया फिल्म्स् र श्री ब्याङ्केट्स इन्टरटेन्मेन्टले गर्नेछन् ।