‘कुमारी’को दोस्रो गीत ‘तिमी बिना…’ सार्वजनिक

नमस्ते चितवन

बिहिबार, पुष ०३, २०८२ मा प्रकाशित

काठमाडौं , पौष ०३ । माघ २३ गतेबाट प्रदर्शनमा आउने प्रेमकथात्मक नेपाली चलचित्र ‘कुमारी’को दोस्रो गीत ‘तिमी बिना…’ सार्वजनिक गरिएको छ। केन्द्र मोशन पिक्चर्सको युट्युब च्यानलमार्फत डिजिटल प्रिमियर गरिएको गीतमा केहर सिंह लिम्बुको स्वर रहेको छ।

गीतमा सुमन तामाङका शब्द छन् भने संगीत सुमन तामाङ र केहर सिंह लिम्बुको रहेको छ। अडियो प्रोडक्सन तथा मिक्सिङ–मास्टरिङ एस्थर रिजनले गरेका हुन्।

गीतको गायन शैली, शब्द र दृश्यात्मक प्रस्तुतिमा प्रेमिल भावनालाई सुन्दर ढंगले उतारिएको छ। गीतमा चलचित्रका मुख्य कलाकार आकृति राजभण्डारी र अबिषेक खड्काबीचको आत्मीयता, आपसी नजिकपन र उत्साहपूर्ण मूडलाई आकर्षक रूपमा देखाइएको छ। यसअघि सार्वजनिक पहिलो गीत ‘कता छौ मेरो फूल…’ले दर्शकको राम्रो प्रतिक्रिया पाएको थियो, जसपछि दोस्रो गीतप्रति पनि दर्शकको उत्साह उच्च रहने अपेक्षा गरिएको छ।

‘आइ एम सरी’, ‘नोभेम्बर रेन’ र ‘क्लासिक’ जस्ता सफल प्रेमकथात्मक चलचित्र निर्देशन गरिसकेका दिनेश राउतको निर्देशनमा बनेको ‘कुमारी’ भ्यालेन्टाइन डेको आसपास प्रदर्शनमा आउने भएकाले चलचित्रले विशेषगरी युवा दर्शकलाई लक्षित गरेको देखिन्छ।

चलचित्रमा नयाँ अनुहार अबिषेक खड्का र आकृति राजभण्डारी मुख्य भूमिकामा छन्। साथै घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने र मनषा शर्मालगायत कलाकारको पनि अभिनय रहेको छ।

पछिल्ला वर्षहरूमा ‘प्रसाद’, ‘प्रकाश’ र ‘पुजार सार्की’ जस्ता सामाजिक विषयमा केन्द्रित चलचित्र निर्देशन गरेका राउत ‘कुमारी’मार्फत पुनः प्रेमकथामा फर्किएका हुन्।

बिनिश इन्टरटेन्मेन्ट र पिक्चर फ्रेमको सहकार्यमा निर्माण भएको चलचित्रका निर्माता महेन्द्र अधिकारी हुन् भने कार्यकारी निर्माता केदार भुसाल रहेका छन्। कथा तथा पटकथा विकास सुवेदीले लेखेका छन्। छायाङ्कन निर्देशन सुशन प्रजापति, सम्पादन तथा कलर ग्रेडिङ सुप्रिम पराजुली र साउन्ड डिजाइन उत्तम न्यौपानेको रहेको छ।

चलचित्रको डिजिटल वितरण केन्द्र मोशन पिक्चर्सले गरेको हो। काठमाडौं उपत्यकामा डिसीएन र उपत्यका बाहिर कुवेर सिने डिस्ट्रीब्युशनले चलचित्र वितरण गर्दैछन्। पोस्टर तथा पब्लिसिटी डिजाइन ट्राइडेन्ट कन्सेप्टले गरेको छ।