चलचित्र ‘कुमारी’को ‘डोको बुन्ने’ गीत सार्वजनिक

काठमाडौं , पौष १६
आगामी माघ २३ गतेदेखि देशव्यापी प्रदर्शनमा आउन लागेको प्रतीक्षित प्रेम कथानक चलचित्र ‘कुमारी’को तेस्रो गीत ‘डोको बुन्ने’ सार्वजनिक गरिएको छ। काठमाडौँको नयाँ बानेश्वरस्थित वन सिनेमाजमा आयोजित विशेष पत्रकार भेटघाट कार्यक्रममा गीत सार्वजनिक गरिएको हो।

यसअघि सार्वजनिक भएका ‘कता छौ मेरो फूल’ र ‘तिमी बिना’ गीतले दर्शकको राम्रो प्रतिक्रिया पाएपछि निर्माण टिमले लोक शैलीमा आधारित नयाँ गीत दर्शकमाझ ल्याएको हो। सार्वजनिक गीत ‘डोको बुन्ने’मा गायक केहर सिंह लिम्बुको स्वर रहेको छ भने सागर लामिछाने मगर र सुमन तामाङका शब्द समेटिएका छन्। गीतमा संगीत सुमन तामाङ र केहर सिंह लिम्बुकै रहेको छ। अडियो प्रोडक्सन, मिक्सिङ तथा मास्टरिङ रिकेश गुरुङले गरेका हुन्।

शिशिर खातीको कोरियोग्राफी रहेको गीतको भिडियोमा चलचित्रका मुख्य कलाकार अबिषेक खड्का र आकृति राजभण्डारीलाई पुराना दिनको प्रेमिल शैलीमा प्रस्तुत गरिएको छ। गीतले नवयुवाहरूबीच मौलाउँदै गएको प्रेम भावनालाई सरल र सुन्दर ढंगले व्यक्त गरेको छ।

कार्यक्रममा बोल्दै निर्देशक दिनेश राउतले आफ्ना सफल प्रेमकथानक चलचित्रहरू ‘आई एम सरी’, ‘नोभेम्बर रेन’ र ‘क्लासिक’ सम्झँदै ‘प्रसाद’, ‘पुजार सार्की’ र ‘प्रकाश’ जस्ता सामाजिक विषयका चलचित्रपछि आफू पुनः प्रेमकथामा फर्किएको बताए। उनले ‘डोको बुन्ने’ गीतले चलचित्रको मौलिकता र नेपालीपनलाई मजबुत रूपमा प्रतिनिधित्व गर्ने धारणा व्यक्त गरे।

यसैगरी, लेखक विकास सुवेदीले गीतले चलचित्रको भावनालाई गहिराइमा प्रस्तुत गर्ने र दर्शकलाई प्रेमकथासँग भावनात्मक रूपमा जोड्ने विश्वास व्यक्त गरे।

मुख्य कलाकार अबिषेक खड्का र आकृति राजभण्डारीले यस चलचित्रमार्फत डेब्यु गर्न पाउँदा खुसी लागेको बताए। आकृतिले बलियो टिम र प्रभावशाली स्क्रिप्टका कारण आफूले डेब्युका लागि ‘कुमारी’ रोजेको बताइन् भने अबिषेकले सानैदेखि चलचित्रप्रति रुचि भएकाले यस कथामा आफूलाई समर्पित गरेर अभिनय गरेको बताए।

कार्यकारी निर्माता केदार भुसालले भ्यालेन्टाइन डेको छेको पारेर रिलिज हुन लागेको यो चलचित्रले सबै उमेर समूहका दर्शकलाई आकर्षित गर्ने विश्वास व्यक्त गरे।

चलचित्रमा अबिषेक खड्का र आकृति राजभण्डारी मुख्य भूमिकामा देखिनेछन्। साथै घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने र मनषा शर्मा लगायत कलाकारको पनि अभिनय रहेको छ।

बिनिश इन्टरटेन्मेन्ट र पिक्चर फ्रेमको सहकार्यमा निर्माण भएको यस चलचित्रका निर्माता महेन्द्र अधिकारी हुन् भने कार्यकारी निर्माता केदार भुसाल हुन्। कथा तथा पटकथा विकास सुवेदीले लेखेका छन्। छायांकन निर्देशन सुसन प्रजापति, सम्पादन तथा कलर ग्रेडिङ सुप्रिम पराजुली र साउन्ड डिजाइन उत्तम न्यौपानेले गरेका छन्।

चलचित्रको डिजिटल वितरण मोशन पिक्चर्सले गर्नेछ भने काठमाडौँ उपत्यकामा डिसीएन र उपत्यका बाहिर कुवेर सिने डिस्ट्रीब्युशनले थिएटर वितरण गर्नेछन्। पोस्टर तथा प्रचार सामग्रीको डिजाइन ट्राइडेन्ट कन्सेप्टले गरेको छ।