तमिलनाडुमा विजय थलपतिको उदय, परम्परागत दल पराजित

नमस्ते चितवन

मङ्गलबार, बैशाख २२, २०८३ मा प्रकाशित

काठमाडौं — भारतका विभिन्न राज्यमा सम्पन्न विधानसभा निर्वाचनको मतगणनाले फरक–फरक राजनीतिक चित्र प्रस्तुत गरेको छ। पश्चिम बंगाल र आसाममा भारतीय जनता पार्टीले अग्रता कायम राख्दा केरला राज्यमा भारतीय राष्ट्रिय कांग्रेस नेतृत्वको गठबन्धन सफल भएको छ। पुडुचेरीमा भने भाजपा सम्मिलित एनडीए गठबन्धनले जित हासिल गरेको छ।

तर सबैभन्दा चासोको विषय तमिलनाडु बनेको छ, जहाँ अभिनेता विजय (थलपति) नेतृत्वको तमिलगा वेत्री कड्गमले उल्लेखनीय सफलता हासिल गरेको छ। २३४ सिटमध्ये १०८ सिट जित्दै उक्त पार्टी पहिलो शक्तिका रूपमा उभिएको छ।

यस नतिजासँगै लामो समयदेखि तमिलनाडुमा प्रभुत्व जमाउँदै आएका द्रविड मुन्नेत्र कड्गम र अल इन्डिया अन्ना द्रविड मुन्नेत्र कड्गम क्रमशः तेस्रो र दोस्रो स्थानमा झरेका छन्। डीएमकेका नेता एम. के. स्टालिनसमेत आफ्नै निर्वाचन क्षेत्रमा पराजित भएका छन्।

५१ वर्षीय विजयले हालै मात्र सक्रिय राजनीतिमा प्रवेश गरेका हुन्। विजय लामो समयदेखि दक्षिण भारतीय फिल्म उद्योगका सफल अभिनेता हुन्, जसले ७० भन्दा बढी फिल्ममा अभिनय गरिसकेका छन्। सन् २०२४ मा राजनीतिमा प्रवेशको घोषणा गरेका उनले छोटो समयमा नै बलियो जनसमर्थन जुटाउन सफल भएका छन्।

उनको पार्टीले युवा, महिला तथा मछुवार समुदाय लक्षित विभिन्न कार्यक्रम अघि सारेको थियो। शिक्षाका लागि बिना धितो ऋण, महिलालाई आर्थिक सहयोग तथा सामाजिक सुरक्षाका योजना घोषणापत्रमा समेटिएका थिए।

राजनीतिक विश्लेषकहरूका अनुसार विजयको उदयले तमिलनाडुको पारम्परिक द्रविडियन राजनीतिमा ठूलो परिवर्तन ल्याएको छ। लामो समयदेखि दुई दलबीच सीमित सत्ता समीकरण अब नयाँ दिशातर्फ मोडिने संकेत देखिएको छ।