‘काजी’को असारे गीत ‘ज्यानको तिर्खा’ सार्वजनिक

नमस्ते चितवन

सोमबार, जेठ ११, २०८३ मा प्रकाशित

काठमाडौं । प्रदर्शनरत नेपाली चलचित्र ‘काजी’को नयाँ गीत ‘ज्यानको तिर्खा’ सार्वजनिक गरिएको छ। असारे भाकामा आधारित गीतमा संगीतकार प्रशान्त सिवाकोटी र गायिका रचना रिमालको स्वर रहेको छ भने शब्द तथा संगीत पनि सिवाकोटीकै रहेको छ।

सार्वजनिक गीतको भिडियोमा चलचित्रका मुख्य कलाकारहरू विपिन कार्की, केकी अधिकारी, गरिमा शर्मा र सन्दीप बाबु लोहनीलाई देख्न सकिन्छ। रोपाइँको परिवेशमा छायांकन गरिएको भिडियोमा ग्रामीण जीवनको रौनक र नेपाली संस्कृतिको झल्को प्रस्तुत गरिएको छ। गीतमा कविराज गहतराजको कोरियोग्राफी रहेको छ भने दृश्य र संगीत दुवै पक्षले दर्शकको ध्यान खिच्ने प्रयास गरेका छन्।

गत जेठ ८ गतेदेखि देशभर प्रदर्शनमा आएको ‘काजी’ले दर्शकबाट सकारात्मक प्रतिक्रिया पाइरहेको निर्माण टिमको दाबी छ। चलचित्रप्रति दर्शकको उत्साह बढ्दै जाँदा अभिनेता विपिन कार्की प्रचार–प्रसारमा सक्रिय देखिएका छन्। उनी विभिन्न सिनेमा हलमा पुगेर दर्शकसँग प्रत्यक्ष भेटघाट गरिरहेका छन्।

दर्शकमाझ चलचित्रको लोकप्रियता बढेसँगै ‘काजी २’ निर्माणको मागसमेत उठ्न थालेको छ। हल भ्रमणका क्रममा धेरै दर्शकले सिक्वेलको अपेक्षा व्यक्त गर्ने गरेको बताउँदै विपिनले दर्शकको माया र साथ निरन्तर रहे ‘काजी २’ बन्न सक्ने संकेत दिएका छन्।

रिजाल एण्ड रिजाल प्रोडक्सनको ब्यानरमा निर्माण भएको चलचित्रका निर्देशक लक्ष्मण रिजाल हुन्। रामप्रसाद रिजाल प्रस्तुतकर्ता रहेको चलचित्रले ग्रामीण परिवेश, मानवीय सम्बन्ध र भावनात्मक कथालाई केन्द्रमा राखेको छ।

प्रदीप भारद्वाजको कथा रहेको चलचित्रमा नेहान रिजाल र विकासराज जोशी निर्माता छन् भने असिम काफ्ले कार्यकारी निर्माताको रूपमा रहेका छन्। चिन्तन राजभण्डारीको छायांकन, कालीप्रसाद बास्कोटाको संगीत, कविराज गहतराजको नृत्य निर्देशन, विपिन मल्लको सम्पादन तथा सुजिल कर्माचार्यको पार्श्व संगीत रहेको चलचित्रले प्रदर्शनको सुरुवाती चरणमै सकारात्मक चर्चा बटुलिरहेको छ।