काठमाडौं । अभिनेता जितु नेपालको निर्माण रहेको चलचित्र ‘आइ एम जीत बहादुर’को ट्रेलर सार्वजनिक गरिएको छ । आगामी असार ५ गतेदेखि प्रदर्शनमा आउने तयारीमा रहेको चलचित्रको ट्रेलर ओएसआर डिजिटलको युट्युब च्यानलमार्फत सार्वजनिक गरिएको हो ।

राजधानीमा आयोजित एक विशेष कार्यक्रमबीच सार्वजनिक गरिएको ट्रेलरमा गाउँबाट सपना बोकेर शहर आएका एक युवाको संघर्षपूर्ण कथा प्रस्तुत गरिएको छ । कलाकार बन्ने लक्ष्य बोकेको पात्रले जीवनमा भोग्नुपरेका चुनौती, संघर्ष र भावनात्मक यात्रालाई ट्रेलरले देखाएको छ ।

ट्रेलरमा जितु नेपाल फरक शैलीमा प्रस्तुत भएका छन् । कलाकार बन्ने सपनाका लागि संघर्षरत युवाको भूमिकामा उनको अभिनय देख्न सकिन्छ ।

भारतीय बंगाली निर्देशक सुभेन्दु घोषको कथा तथा निर्देशनमा बनेको चलचित्रमा अभिनेत्री वर्षा राउत मुख्य भूमिकामा छिन् । यसअघि सार्वजनिक गरिएको टिजरले पनि दर्शकबाट सकारात्मक प्रतिक्रिया पाएको निर्माण टिमले जनाएको छ ।

चलचित्रमा प्रियंका कार्की, सन्दीप क्षेत्री, देशभक्त खनाल, पवन खतिवडा ‘बाबा’, निरज नेपाल, अन्सु महर्जनलगायत कलाकारको अभिनय रहेको छ ।

कर्मभूमि क्रिएशनको ब्यानरमा निर्माण भएको चलचित्रका कार्यकारी निर्माता निश्चल कुँवर र निरज नेपाल हुन् । राजन सिंखडा तथा दीपेन्द्र अधिकारी सह–निर्माताका रूपमा रहेका छन् ।

भारतीय सिनेमाटोग्राफर अरविन्दको छायांकन रहेको चलचित्रको पोस्ट–प्रोडक्सन कार्य भारतमा गरिएको निर्माण पक्षले जनाएको छ । चलचित्रको वितरण आरआर फिल्म्सले गर्नेछ भने डिजिटल अधिकार ओएसआर डिजिटलले लिएको छ ।

लामो समयदेखि नेपाली मनोरञ्जन क्षेत्रमा सक्रिय रहेका जितु नेपालका लागि ‘आइ एम जीत बहादुर’ विशेष चलचित्रका रूपमा हेरिएको छ ।