पल शाह र अस्मिता जुरेलीको रोमान्टिक केमेस्ट्री रहेको ‘कुरो बुझेसी’ सार्वजनिक

नमस्ते चितवन

मङ्गलबार, जेठ १९, २०८३ मा प्रकाशित

काठमाडौं । गायक तथा संगीतकार आशिष अविरल र चर्चित गायिका मेलिना राईको स्वरमा सजिएको नयाँ नेपाली गीत ‘कुरो बुझेसी’ सार्वजनिक गरिएको छ। प्रेमभावमा आधारित गीतलाई गीतकार सुन्दर हमालले शब्द दिएका हुन् भने संगीत, एरेन्ज, मिक्सिङ र मास्टरिङको सम्पूर्ण जिम्मेवारी आशिष अविरलले नै सम्हालेका छन्।

राग एन्ड आरएल स्टुडियो (अमेरिका) र एमडी बाल्टिमोरमा रेकर्ड गरिएको गीतको भिडियोमा अभिनेता पल शाह र मोडल अस्मिता जुरेलीको आकर्षक अभिनय देख्न सकिन्छ। भिडियोमा प्रस्तुत गरिएको उनीहरूको रोमान्टिक केमेस्ट्री र नृत्यले दर्शकको ध्यान खिच्न सफल भएको छ।

प्रेम कथामा आधारित गीतले एकअर्कालाई राम्रोसँग बुझिसकेपछि सम्बन्धमा आउने आत्मीयता, विश्वास र भावनात्मक उतारचढावलाई कलात्मक ढंगले प्रस्तुत गरेको छ।

अमित कुमार चन्दको निर्माण रहेको भिडियोको निर्देशन शान थापाले गरेका हुन्। भिडियोमा सञ्जय विश्वकर्माको कोरियोग्राफी, दिनेश पराजुलीको छायांकन, विवेक सुनारको सम्पादन तथा मिलन विश्वकर्माको कलर ग्रेडिङ रहेको छ।

कलाकारहरूको पहिरन अनुस्का डीसी (आश्री क्रिएसन) ले तयार पारेकी हुन् भने मेकअपको जिम्मेवारी सीता मगरले सम्हालेकी छन्।

‘कुरो बुझेसी’ गीत पल शाहको आधिकारिक युट्युब च्यानलमार्फत सार्वजनिक गरिएको हो। गीतको संगीत, दृश्य प्रस्तुति र कलाकारहरूको अभिनयका कारण दर्शक तथा श्रोतामाझ राम्रो प्रतिक्रिया प्राप्त हुने अपेक्षा गरिएको छ।