छाउपडी प्रथाको पीडा बोकेको ‘हली’को टिजर सार्वजनिक

नमस्ते चितवन

शनिबार, असार ०६, २०८३ मा प्रकाशित

काठमाडौं । साउन २२ गतेबाट प्रदर्शनमा आउन लागेको चलचित्र ‘हली’को टिजर सार्वजनिक गरिएको छ। प्रदर्शन मिति नजिकिँदै जाँदा निर्माण पक्षले प्रचार अभियानलाई तीव्र बनाउने क्रममा टिजर सार्वजनिक गरेको हो।

एक मिनेट २८ सेकेन्ड लामो टिजरले नेपाली समाजमा अझै विद्यमान छाउपडी प्रथाको पीडादायी पक्षलाई उजागर गरेको छ। महिनावारी भएका कारण एक किशोरीलाई घरबाट अलग्गै गोठमा राखिने परम्परा र त्यसले निम्त्याउने सामाजिक तथा मानवीय पीडालाई टिजरमा मार्मिक ढंगले प्रस्तुत गरिएको छ।

टिजरमा छोरीलाई महिनावारी भएका बेला परिवारका सदस्य, विशेषगरी बुबाले समेत अनुहार हेर्न नहुने जस्ता अन्धविश्वासलाई चित्रण गरिएको छ। यस्ता विभेदकारी प्रथाविरुद्ध एक शिक्षित युवाले कानुनी लडाइँ सुरु गरेको संकेत पनि टिजरले दिएको छ। कथावस्तु पुरानो सामाजिक अभ्याससँग जोडिएको देखिए पनि यसको सन्दर्भ आजको नेपाली समाजसँग प्रत्यक्ष रूपमा सम्बन्धित रहेको अनुमान गर्न सकिन्छ।

ओम प्रतीकको लेखन तथा निर्देशनमा बनेको चलचित्रमा उनी स्वयं मुख्य भूमिकामा छन्। साथै सरोज खनाल, प्रमोद दीप, अरुणा कार्की, अर्जुन गुरुङ, विद्या कार्की, नवीन श्रेष्ठ, कञ्चन दुलाल, कमल गाउँले र विशाल पहाडीको अभिनय पनि चलचित्रमा रहनेछ।

जापुरा फिल्म्स प्रोडक्सन र शुभ चिरायू फिल्म्सको संयुक्त प्रस्तुतिमा निर्माण भएको चलचित्रमा व्यवसायी पूजा गुरुङ र जश्मिन श्रेष्ठको लगानी रहेको छ।

यसअघि चलचित्रको प्रचारका लागि सार्वजनिक गरिएको विशेष गीतले पनि दर्शकमाझ राम्रो चर्चा पाएको थियो। उक्त गीतमा दीपाश्री निरौला, किरण केसी, दिलीप रायमाझी, प्रियंका कार्की र पूजा शर्माले विशेष नृत्य प्रस्तुत गरेका छन्।

चलचित्रको कोरियोग्राफी कविराज गहतराजले गरेका छन् भने केही गीतमा ओम प्रतीक र गहतराजले संयुक्त रूपमा काम गरेका छन्। राहुल राईको छायांकन रहेको चलचित्रको सम्पादन रामप्रसाद चौधरी र विपिन मल्लले गरेका हुन्।

चलचित्रका गीतमा शम्भुजित बास्कोटा, बाबुल गिरी र कृष्ण भारद्वाजको संगीत सुन्न पाइनेछ। जश्मिन श्रेष्ठको शब्द तथा बाबुल गिरीको संगीत रहेको गीतमा बाबुल गिरी र शान्तिश्री परियारको स्वर रहेको छ।

कुमार महर्जनको द्वन्द्व निर्देशन रहेको चलचित्रको वितरण नेशनल सिने ग्रुप प्रालिले गर्नेछ भने डिजिटल पार्टनरका रूपमा ओएसआर डिजिटल रहेको छ। चलचित्रको प्रचारप्रसारका लागि विदेशबाट अभिनेत्री सुजता थापा पनि नेपाल आइसकेकी छन्।