भावुक बनाउने ‘बा : एक योद्धा’को टिजर सार्वजनिक

नमस्ते चितवन

शुक्रबार, साउन ०८, २०८३ मा प्रकाशित

काठमाडौं । नेपाली चलचित्र ‘बा : एक योद्धा’को बहुप्रतीक्षित टिजर सार्वजनिक गरिएको छ। आगामी भदौ १९ गतेदेखि प्रदर्शनमा आउन लागेको चलचित्रको टिजरले परिवार, बुवाको त्याग र अप्रत्याशित पीडाको भावनात्मक कथा उजागर गर्दै दर्शकको ध्यान तानेको छ।

‘एउटा सानो संसार थियो हाम्रो, सब तहसनहस भयो’ भन्ने संवादसँग सुरु हुने टिजरमा मुख्य अभिनेता दिव्यदेव पन्त रगतले लत्पतिएको अवस्थामा घर फर्किएको देखिन्छ। उनको अनुहार, हाउभाउ र अवस्थाले परिवारमा ठूलो दुर्घटना वा कहालीलाग्दो घटना घटेको संकेत गर्छ।

घर पुग्नेबित्तिकै उनका मनमा विगतका खुसीका पलहरू चलचित्रझैँ एकपछि अर्को गर्दै फर्किन्छन्। सुखी परिवारको मुस्कानसँगै छोरीले ‘बाबा’ भन्दै दौडिरहेको दृश्य, गाउँभरि फैलिएको त्रास, आत्तिएका गाउँले र परिवारमा आएको अचानकको विपत्तिले टिजरलाई थप भावुक बनाएको छ।

टिजरको अर्को सशक्त संवाद ‘आज बाउको मुख हेर्ने दिन… तर एउटा बाले आफ्नै छोराको मुख हेर्न पाएन’ ले कथाको संवेदनशील पक्षलाई अझ गहिरो बनाउँछ। झरना थापा र सुहाना थापाको भावुक अभिनयले पनि टिजरको प्रभावलाई थप मजबुत बनाएको छ।

टिजरले एउटा सामान्य र खुसी परिवारको जीवन कसरी एकाएक बदलिन्छ भन्ने देखाए पनि त्यो विपत्तिको कारण भने रहस्यमै राखिएको छ। यही रहस्यले चलचित्रप्रति दर्शकको जिज्ञासा बढाउने अपेक्षा गरिएको छ।

हरि लम्सालको लेखन तथा निर्देशनमा बनेको चलचित्रले नेपाली समाजमा बुवाले सन्तानका लागि गर्ने अथाह त्याग, संघर्ष, जिम्मेवारी र पारिवारिक सम्बन्धको भावनात्मक पक्षलाई केन्द्रमा राखेको छ। चलचित्र कुशे औँसी (बुबाको मुख हेर्ने दिन)को पूर्वसन्ध्यामा प्रदर्शनमा आउनेछ।

चलचित्रमा दिव्यदेव पन्त, झरना थापा, सुहाना थापा, माओत्से गुरुङ, अनिल बुढाथोकी, सागर खनाल, शिशिर शिवाकोटी, सुप्रज्ञा शर्मा र शवि थापाको अभिनय रहेको छ।

आर्टिस्टिक इन्टरटेनमेन्टको ब्यानरमा निर्माण भएको चलचित्रका निर्माता वसन्त लम्साल हुन्। कथा, पटकथा र निर्देशन हरि लम्साल स्वयंले गरेका छन् भने शिवराम श्रेष्ठको छायांकन, तारानाथ न्यौपानेको मुख्य सहायक निर्देशन रहेको छ।चलचित्रलाई कुवेर सिने डिस्ट्रिब्युसनमार्फत आशिष एच. तामाङ र प्रदीप धामीले देशभर वितरण गर्नेछन्।