बुवा र जन्मभूमिको सम्मान बोकेको ‘बा : एक योद्धा’को शीर्ष गीत सार्वजनिक

नमस्ते चितवन

शनिबार, साउन १६, २०८३ मा प्रकाशित

काठमाडौं । आगामी भदौ १९ गतेदेखि प्रदर्शनमा आउन लागेको नेपाली चलचित्र ‘बा : एक योद्धा’को शीर्ष गीत सार्वजनिक गरिएको छ। निर्माण टिमले शुक्रबार सार्वजनिक गरेको गीतले बुवा, परिवार, जन्मभूमि र आफ्नोपनप्रतिको सम्मानलाई भावुक ढंगले प्रस्तुत गरेको छ।

‘चढेको बुई नबिर्स, टेकेको भुइँ नबिर्स’ बोल रहेको गीतमा सञ्जीव थापाको शब्द, हरि लम्सालको संगीत तथा स्वर रहेको छ। गीतले सफलता प्राप्त गरेपछि पनि आफ्नो जन्मभूमि, परिवार र आफूलाई हुर्काउने आधारलाई कहिल्यै नबिर्सनुपर्ने सन्देश दिएको छ।

रुख र जरा तथा माटो र पानीको सम्बन्धलाई प्रतीकात्मक रूपमा प्रस्तुत गर्दै गीतले जन्म दिने बुवाआमा, आफ्ना आफन्त र मातृभूमिप्रतिको माया तथा सम्मान नै जीवनको सबैभन्दा ठूलो आधार भएको भाव व्यक्त गरेको छ। ओजपूर्ण शब्द र मर्मस्पर्शी भावले चलचित्रले दिन खोजेको सन्देशलाई प्रभावशाली रूपमा उजागर गरेको छ।

गीतको भिडियोमा चलचित्रका मुख्य कलाकार दिव्यदेव, सुहाना थापा र झरना थापासहित अन्य कलाकारहरू देखिएका छन्। बाल्यकालदेखि हुर्किएर परदेश पुग्ने सन्तान, उनीहरूको भविष्यका लागि जीवनभर संघर्ष गर्ने बुवाको त्याग र अन्ततः एक्लोपनको पीडालाई चलचित्रका दृश्यहरूमार्फत प्रस्तुत गरिएको छ।

नेपाली समाजमा सन्तानको उज्ज्वल भविष्यका लागि बुवाले गर्ने त्याग, संघर्ष र जीवनभरका चुनौतीलाई मुख्य कथावस्तु बनाइएको ‘बा : एक योद्धा’ आगामी भदौ १९ गते देशभर प्रदर्शनमा आउनेछ। चलचित्रमा दिव्यदेव, झरना थापा, सुहाना थापा, माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा र शवि थापाको अभिनय रहेको छ।

चलचित्रका लेखक तथा निर्देशक हरि लम्साल हुन्। नेपाली संगीत क्षेत्रमा दर्जनौं चर्चित गीत दिएका लम्सालको यो पहिलो फिचर फिल्म निर्देशन हो। चलचित्रको कथा र पटकथा पनि उनले नै तयार पारेका छन्।

आर्टिस्टिक इन्टरटेनमेन्टको ब्यानरमा निर्माण भएको चलचित्रका निर्माता वसन्त लम्साल हुन् भने अनिल बुढाथोकी कार्यकारी निर्माता, अर्जुन पौडेल लाइन प्रोड्युसर र कृष्ण काफ्ले सह–निर्माता रहेका छन्।

शिवराम श्रेष्ठको छायांकन रहेको चलचित्रका मुख्य सहायक निर्देशक तारानाथ न्यौपाने हुन्। चलचित्रलाई आशिष एच तामाङ र प्रदीप धामीको कुवेर सिने डिस्ट्रिब्युसनले देशव्यापी रूपमा वितरण गर्नेछ।