‘मास्टर्नी’को ट्रेलर सार्वजनिक, आमा–छोरीको भावनात्मक सम्बन्धसँगै क्राइम थ्रिलरको रोमाञ्च

नमस्ते चितवन

बिहिबार, साउन २१, २०८३ मा प्रकाशित

काठमाडौं, साउन २१
आयंका फिल्म्सको प्रस्तुति रहेको नेपाली चलचित्र ‘मास्टर्नी’को ट्रेलर सार्वजनिक गरिएको छ। यसअघि सार्वजनिक पोस्टर र टिजरले कथावस्तुप्रति उत्सुकता जगाएको चलचित्रले ट्रेलरमार्फत आफ्नो भावनात्मक र रहस्यमय पक्षलाई अझ स्पष्ट बनाएको छ।

सार्वजनिक ट्रेलरमा आमा र छोरीबीचको गहिरो सम्बन्ध, छोरीको सुरक्षाका लागि आमाले गर्ने संघर्ष तथा त्यसक्रममा आउने चुनौतीलाई मुख्य रूपमा प्रस्तुत गरिएको छ। क्राइम थ्रिलर र फ्यामिली ड्रामा जनरामा निर्माण भएको चलचित्रको ट्रेलरले रहस्य, भावना र सस्पेन्सलाई सन्तुलित रूपमा प्रस्तुत गरेको छ।

ट्रेलरमा प्रियंका कार्की जोशी, सिम्रन खड्का, दीपकराज गिरी, दीपाश्री निरौला, सन्दीप क्षेत्री, प्रमोद अग्रहरी, ऋचा शर्मा, आर्यन सिग्देल, दिनेश काफ्ले र रक्षा थापालगायत कलाकारहरूको दमदार उपस्थिति देख्न सकिन्छ। ट्रेलरको कलर ग्रेडिङ राजेन्द्र मोक्तानले गरेका हुन् भने ध्वनि मिश्रण मुकेश शाहले गरेका छन्।

सुवेन्दु घोषको निर्देशनमा बनेको चलचित्रलाई प्रियंका कार्की जोशी, आयुष्मान जोशी, क्याबिनेट श्रेष्ठ र प्रनित कार्कीले संयुक्त रूपमा निर्माण गरेका हुन्। सुरक्षा सिंह मल्होत्रा र सिमोस सुनुवार कार्यकारी निर्माता रहेका छन्।

चलचित्रको कथा प्रियंका कार्कीले लेखेकी हुन् भने पटकथा शान बस्नेतले तयार पारेका छन्। संवाद लेखनमा प्रियंका कार्की र शान बस्नेतको सहकार्य रहेको छ।

युवराज इन्दोरियाको छायांकन, राजा सिंह सिद्धुको सम्पादन, रोहित शाक्यको संगीत तथा त्रिशला गुरुङको स्वर रहेको चलचित्रको पोस्ट–प्रोडक्सन नेपाल र भारतमा भइरहेको निर्माण पक्षले जनाएको छ।

भदौ ५ गतेदेखि प्रदर्शनमा आउन लागेको *मास्टर्नी’को पोस्टर डिजाइन तथा पब्लिसिटी पार्टनर रोयल भीमसेन (ट्राइडेन्ट कन्सेप्ट टिम) रहेको छ भने चलचित्रलाई नेपालभर आरआर फिल्म्सले वितरण गर्नेछ।