सभ्यता विकासका लागि भाषा जीवन्त राख्नुपर्छ : मन्त्री गौतम

नमस्ते चितवन

सोमबार, साउन २५, २०८३ मा प्रकाशित

कानुन, न्याय तथा संसदीय मामिला मन्त्री सोविता गौतमले भाषा जीवन्त राख्नु भनेको सभ्यता, संस्कृति र पुर्खाहरुको ज्ञानलाई अगाडि बढाउनु रहेको बताउनुभएको छ ।

नेपाल आदिवासी जनजाति पत्रकार महासङ्घद्वारा सोमबार ‘मातृभाषा पत्रकारिता : भाषा संरक्षण, सांस्कृतिक अधिकार र दिगो विकास’ भन्ने नाराका साथ काठमाडौँमा आयोजित तेस्रो अन्तर्राष्ट्रिय मातृभाषा पत्रकारिता सम्मेलन–२०२६ को उद्घाटन सत्रमा उहाँले सो कुरा बताउनुभएको हो ।

मन्त्री गौतमले भन्नुभयो, ‘‘कतिपय भाषाहरु हाम्रो समुदायमा छ त भन्ने किसिमको हुन सक्छ तर ती भाषालाई प्रयोगमा ल्याएनौँ भने ती भाषा जीवन्त रहँदैन । भाषालाई जीवन्त राख्नु भनेको हाम्रो सभ्यता, संस्कृति र पुर्खाहरुको ज्ञान यिनीहरु सबैलाई अगाडि बढाउनु पनि हो ।’’

उहाँले राज्यका सबै सूचना देशका सबै क्षेत्रमा पुग्नुपर्ने भन्नुहुँदै यसका लागि राज्यले आफ्नो क्षेत्रबाट पहल गर्दै आएको उल्लेख गर्नुभयो । उहाँले भन्नुभयो, ‘‘आज हाम्रो नेपालको हरेक कुना काप्चामा गएर हामीले नेपाली दिदीबहिनीलाई सोध्यौँ भने राज्यका सबै सूचना तपाईंले प्राप्त गर्नुभएको छ त ? कहि न कतै त्यहाँ हामीले दुरी भेटिरहेका हुन्छौँ । अब त्यो दुरीलाई मेटाउने जिम्मेवारी राज्यले आफ्नोतर्फबाट पहल त गर्छ तर यो दुरी मेटाउने सबैभन्दा ठूलो जिम्मेवारी तपाइहरुको काँधमा छ ।’’

उहाँले मातृभाषी पत्रकारलाई हेपिएको वा चेपिएको भन्ने महसुस नगर्न भन्नुहुँदै यस विषयमा सबैले आत्मआलोचना गरेर सुधारको बाटोमा जानुपर्ने पनि बताउनुभयो ।

मन्त्राी गौतमले भन्नुभयो, ‘‘नेपाली समाजमा भएका हरेक मानिसहरु जो सूचनाको पहुँचबाट टाढा छन्, उहाँहरुलाई सूचना दिएर मूलधारमा ल्याउन यहाँहरुले जुन भूमिका खेल्नुभएको छ, यहाँहरुप्रति कृतज्ञता व्यक्त गर्नैपर्छ । यहाँहरुले पेलिएको, हेपिएको भन्ने जुन महसुस गर्नुभएको छ, त्यो महसुस कसको कारणले भएको छ ? सबैले आत्मालोचना गरेर सुधारको बाटोमा हामी जानैपर्छ भन्ने मलाई लाग्छ ।’’