रसुवा बाढी पीडितलाई राहत लागि जुट्दै चितवनका खेलकुद संघ संस्था

नमस्ते चितवन

बिहिबार, भदौ ११, २०८३ मा प्रकाशित

चितवन । चितवन जिल्ला खेलकुद बिकास समितिले रसुवा बाढी पीडितलाई राहत र उद्धारका लागि सहयोग गर्न जिल्लाका सबै खेलकुद संघ संस्थालाई अपिल गरेको छ ।

समितिले आज (बिहीबार) खेलकुदका सबै संघ संस्थाको संयुक्त बैठक राखेर सहयोगको अपिल गरेको हो । समितिका अध्यक्ष राजन कार्कीले प्राकृतिक विपद्को यस कठिन घडीमा खेलकुद क्षेत्रले पनि आफ्नो सामाजिक दायित्व निर्वाह गर्नुपर्ने बताए । उनले जिल्लाका सबै खेलकुद संघ संस्थालाई आफ्नो क्षमता र स्रोतअनुसार राहत तथा उद्धारका लागि सहयोग गर्न आग्रह गरे ।

बैठकमा सहभागी सबै खेलकुद संघ संस्थाहरु राहत तथा उद्धारका लागि सहयोग गर्ने प्रतिवद्धता जनाएका छन् । जस अनुसार जिल्ला खेलकुद बिकास समितिले प्रधानमन्त्री दैवी प्रकोप उद्धार कोषमा ५० हजार रुपैयाँ सहयोग गर्ने भएको छ । जिल्ला भविबल संघका अध्यक्ष तोरण ढकालले संघको तर्फबाट २१ हजार तथा क्रिकेट संघका कार्यवाहक अध्यक्ष उमेश पियाले संघको तर्फबाट २० हजार रुपैयाँ सहयोग गर्ने बताएका छन् ।

समितिका अध्यक्ष कार्कीले अन्य खेलकुद संघ संस्थाले पनि दुई दिन भित्र सहयोग सुनिश्चित गरेपछि एकैदिन प्रधानमन्त्री दैवी प्रकोप उद्धार कोषमा एकमुष्ट रकम जम्मा गर्ने बताए । ‘हामीले पैसा उठाउन खोजेको होइनौं । सरकारले पनि नउठाउ नै भनेको छ । सबै खेलकुद संघ संस्था सहयोग रकम सुनिश्चित गरेर एकैपटक कोषमा हाल्ने कुरा भयो । त्यसैले दुई दिन भित्र जति सकिन्छ त्यती रकम सुनिश्चित गरेर कोषमा जम्मा गर्न लागेका हौं, कार्कीले भने, ‘त्यो पैसा सिधै प्रधानमन्त्री दैवी प्रकोप उद्धार कोषमा जम्मा गर्छौं ।’

कार्कीले खेलकुदसँग सम्बन्धित अन्य संघ संस्था तथा व्यक्तिहरुलाई पनि विपद्को घडीमा राहत तथा उद्धारका लागि सक्दो सहयोग गर्न अपिल गरेका छन् । विपद्को समयमा मानवीय संवेदना र एकता नै सबैभन्दा ठूलो शक्ति भएकाले चितवनका खेलकुद क्षेत्रबाट सक्दो सहयोग हुने समितिका कार्यालय प्रमुख रामजी ढकालको भनाइ छ । यस्तै बैठकले मुलुकको इतिहासमै त्रासदीपूर्ण घटनामा परी ज्यान गुमाएकाहरु श्रद्धाञ्जली व्यक्त गर्दै घाइतेहरुको स्वास्थ्य लाभको कामना पनि गरेको छ ।