चितवनमा भोटेकोशी बाढीका २५९ शव भेटिए, ९६ शव देवघाटमा व्यवस्थापन

नमस्ते चितवन

आइतबार, भदौ १४, २०८३ मा प्रकाशित

चितवन । रसुवाको भोटेकोशी नदीमा आएको बाढीपछि त्रिशूली र नारायणी नदी हुँदै चितवनसम्म बगेर आएका शवको खोजी तथा व्यवस्थापन कार्य जारी रहेको छ।

जिल्ला प्रहरी कार्यालय चितवनका अनुसार हालसम्म चितवनका विभिन्न स्थानबाट २५९ वटा शव फेला परेका छन्। तीमध्ये पहिचान हुन नसकेका ९६ वटा शवको डीएनए नमुना संकलन गरी सुरक्षित राखेर देवघाटस्थित जङ्गल क्षेत्रमा व्यवस्थापन गरिएको छ।

देवघाटमा व्यवस्थापन गरिएका ९६ शवमध्ये ३५ महिला, ५९ पुरुष तथा २ वटा अन्य अवशेष रहेका छन्। भविष्यमा पहिचान खुल्न सक्ने भएकाले शवबाट डीएनए नमुना लिएर सुरक्षित राखिएको जिल्ला प्रहरी कार्यालय चितवनका प्रमुख एसपी रामेश्वर पौडेलले जानकारी दिए।

चितवनमा हालसम्म फेला परेका २५९ शवमध्ये ६० महिला, १०७ पुरुष, ६ बालक, ४ बालिका र ८२ वटा अन्य अवशेष रहेका छन्।

प्रहरीका अनुसार हालसम्म ९ जनाको सनाखत भएको छ। सनाखत भएकामध्ये ८ पुरुष र १ बालिका रहेका छन्। पहिचान खुलेपछि शव सम्बन्धित आफन्तलाई बुझाइएको छ।

नदी किनारमा शव फेला पर्ने क्रम अझै जारी रहेकाले खोजी तथा व्यवस्थापन कार्यलाई निरन्तरता दिइएको प्रहरीले जनाएको छ। खोजी अभियानमा नेपाली सेना, नेपाल प्रहरी र सशस्त्र प्रहरीलाई संयुक्त रूपमा परिचालन गरिएको छ।