‘बेहुली’को ट्रेलरमा प्रेम, परिवार र मित्रताको कथा, बाढीपीडितलाई ५ प्रतिशत सहयोग

काठमाडौं । प्रदर्शनको पाँच दिनअघि प्रतीक्षित नेपाली चलचित्र ‘बेहुली’को आधिकारिक ट्रेलर सार्वजनिक गरिएको छ। आगामी भदौ २६ गतेदेखि प्रदर्शनमा आउन लागेको चलचित्रको ट्रेलर आइतबार काठमाडौंस्थित जय नेपाल हलमा आयोजित विशेष कार्यक्रममार्फत सार्वजनिक गरिएको हो।

भोटेकोसी क्षेत्रमा आएको बाढीका कारण देशमा उत्पन्न असहज परिस्थितिलाई ध्यानमा राख्दै निर्माण पक्षले यसअघि चलचित्रका प्रचारप्रसारका सम्पूर्ण कार्यक्रम स्थगित गरेको थियो। अवस्था केही सहज बनेपछि ट्रेलर सार्वजनिक गर्दै चलचित्रको प्रचार अभियान पुनः सुरु गरिएको हो।

ट्रेलर सार्वजनिक कार्यक्रममा चलचित्रका प्रस्तुतकर्ता तथा निर्माता अर्जुन पोखरेलले बाढी प्रभावितका लागि सहयोग गर्ने घोषणा गरे। चलचित्रले बक्स अफिसबाट गर्ने कुल आम्दानीमध्ये निर्माताको भागमा पर्ने रकमको ५ प्रतिशत प्रधानमन्त्री दैवी प्रकोप उद्धार राहत कोषमार्फत भोटेकोसी क्षेत्रका बाढीपीडितका लागि उपलब्ध गराइने उनले बताए।

सङ्कटको समयमा चलचित्र क्षेत्रबाट गरिएको उक्त घोषणाको उपस्थित सञ्चारकर्मी तथा चलचित्रकर्मीहरूले प्रशंसा गरेका थिए।

सार्वजनिक ट्रेलरमा प्रेम, माया, पारिवारिक सम्बन्ध र मित्रताका विभिन्न पक्षलाई प्रस्तुत गरिएको छ। सामाजिक सञ्जालमा ‘कुल ब्वाई’का रूपमा परिचित पारस बम ठकुरी र अभिनेत्री दिव्या रायमाझीबीचको प्रेमसम्बन्ध तथा केमेस्ट्रीलाई ट्रेलरमा विशेष रूपमा देखाइएको छ।

त्यस्तै, अभिनेता सुशान्त कार्की प्रहरीको भूमिकामा प्रस्तुत भएका छन्। कमेडियन पदम तामाङको हास्य प्रस्तुति र सन्तोष बानियाको फरक भूमिकाले पनि ट्रेलरमा कौतुहल थपेको छ। ओएसआर डिजिटलको युट्युब च्यानलमार्फत सार्वजनिक गरिएको ट्रेलरले दर्शकबाट सकारात्मक प्रतिक्रिया पाइरहेको निर्माण पक्षले जनाएको छ।

सशान कँडेलको निर्देशन तथा माधव शर्माको लेखन रहेको चलचित्रमा पारस, दिव्या, सुशान्त, पदम र सन्तोषसँगै सरिता गिरी, विशाल पहारी, कर्मा लामा, दीपक गौली, विमल यादव, अविरल श्रेष्ठ, सविन कट्टेल र समायरा थापा मगरलगायतको अभिनय छ।

द डिभाइन म्युजिक र सम्मान इन्टरटेन्मेन्टको संयुक्त प्रस्तुतिमा निर्माण भएको चलचित्रमा अर्जुन पोखरेल प्रस्तुतकर्ता, प्रताप शमशेर राणा निर्माता तथा शङ्कर कोइराला र रमेश सिलवाल कार्यकारी निर्माता छन्। दुर्गा खरेल र शिशिर श्रेष्ठ सह–निर्माता रहेका छन्। कोसिस राज क्षेत्री र सम्राट क्षेत्री लाइन प्रोड्युसर हुन्।

चलचित्रमा नरेन्द्र मैनालीको छायांकन, विकास दाहालको सम्पादन र रोशन श्रेष्ठको एक्सन कोरियोग्राफी छ। सुदीप कुँवर मुख्य सहायक निर्देशक रहेको चलचित्रमा योगेन्द्र कार्की र मार्लोभ ढुङ्गाना सहायक निर्देशक छन्।

यमप्रसाद ओली प्रोडक्सन हेड रहेको चलचित्रको प्रोडक्सन डिजाइन किशोर नेपालले गरेका छन् भने राजु वाइबाले मेकअप र एलेक्स बासुकलाले पहिरन डिजाइन गरेका छन्।

‘बेहुली’को काठमाडौं उपत्यकाभित्र काफिया फिल्म्स र उपत्यकाबाहिर श्री व्यंकटेश इन्टरटेन्मेन्टले वितरण गर्नेछन्। चलचित्रको डिजिटल अधिकार ओएसआर डिजिटलले खरिद गरेको छ।