नारायणगढ–मुग्लिन सडकमा आज आंशिक आवागमन बन्द

नमस्ते चितवन

सोमबार, भदौ २२, २०८३ मा प्रकाशित

चितवन । नारायणगढ–मुग्लिन सडकखण्ड आज बिहानदेखि आंशिक रूपमा बन्द हुने भएको छ। तुइन खोलामा पहिरो रोकथाम तथा माथिल्लो भागमा रहेको झर्न सक्ने माटो पन्छाउने काम गर्न सवारी आवागमन केही समय रोक्न लागिएको चितवन प्रशासनले जनाएको छ।

प्रशासनका अनुसार धादिङको कृष्णभिरमा सडक मर्मतको काम भइरहेका कारण त्यस अवधिको सदुपयोग गर्दै तुइन खोला परियोजनाअन्तर्गत माटो कटान तथा पहिरो रोकथामको काम गरिनेछ। कृष्णभिरको सडक मर्मत सम्पन्न भएर नियमित सवारी आवागमन सञ्चालनमा नआएसम्म तुइन खोलामा उक्त काम जारी रहनेछ।

सवारी आवागमन आंशिक रूपमा रोकेर तुइन खोलामा पटक–पटक खस्ने पहिरोको माथिल्लो भागमा रहेको जोखिमयुक्त माटो हटाइने प्रशासनले जनाएको छ।

निर्धारित तालिकाअनुसार नारायणगढ–मुग्लिन सडकखण्ड बिहान ८:०० देखि ८:३० बजे, १०:३० देखि ११:०० बजे, दिउँसो १:०० देखि १:३० बजे, ३:५० देखि ४:०० बजे र साँझ ६ बजेपछि सवारी आवागमन सञ्चालन गरिनेछ।