‘झिंगे दाउ २’को ट्रेलर सार्वजनिक, दाजुभाइको झगडादेखि आमाको ममतासम्म

नमस्ते चितवन

आइतबार, भदौ २८, २०८३ मा प्रकाशित

काठमाडौं । असोज २ गतेदेखि प्रदर्शनमा आउन लागेको चलचित्र ‘झिंगे दाउ २’को ट्रेलर सार्वजनिक गरिएको छ। सार्वजनिक ट्रेलरमा दाजुभाइ तथा देउरानी–जेठानीबीचको झगडा, आमाको ममता, सन्तानको प्रेम र हराएकी आमा खोज्ने कथालाई प्राथमिकताका साथ प्रस्तुत गरिएको छ।

ट्रेलरले चलचित्रको पारिवारिक कथावस्तु, भावनात्मक सम्बन्ध र द्वन्द्वलाई देखाएको छ। ट्रेलर सार्वजनिक भएसँगै चलचित्रप्रति दर्शकको उत्सुकता थप बढ्ने निर्माण पक्षको अपेक्षा छ।

कपनगढी सिनेमा प्रालि र फिल्म क्रिउ नेपाल प्रालिको ब्यानरमा निर्माण भएको चलचित्रलाई ज्ञानेन्द्र देउजाले निर्देशन गरेका हुन्। सुलभ प्रतिक देउजा र समीक्षा देउजा निर्माता हुन् भने रोशनी अधिकारी देउजा र नीतु श्रेष्ठ देउजा सह–निर्मातामा छन्।

विष्णु घिमिरे ‘कल्पित’को छायांकन रहेको चलचित्रलाई मित्र डी गुरुङले सम्पादन गरेका छन्। अर्जुन पोखरेलको संगीत तथा रोशन श्रेष्ठको एक्सन रहेको चलचित्रका प्रोडक्सन हेड ईश्वर घिमिरे हुन्।

चलचित्रमा केकी अधिकारी र आँचल शर्मासँगै महेश त्रिपाठी, कुशल विष्ट, आर्यन सिग्देल, हिउँवाला गौतम, सरोज खनाल, बसुन्धरा भुसाल, चैत्यदेवी सिंह, संगम भण्डारी, विजय देउजा, अंशु महर्जन, अभयराज बराल, उत्तम केसी, आशा भुसाललगायत कलाकारको अभिनय छ।

परिच्छेद सेनको पटकथा तथा संवाद रहेको चलचित्रको लेखन गोविन्दु फुयाँल र शिशिर चालिसेले गरेका हुन्।

यसअघि सार्वजनिक गरिएको ‘झिंगे दाउ २’को टिजरले दर्शकको ध्यान तानिसकेको छ। चलचित्रमा समावेश ‘जेठानी भर्सेस देउरानी’ बोलको तीज ब्याटल गीत पनि युट्युब तथा टिकटकमा चर्चामा छ। गीतले छोटो समयमै ३७ लाखभन्दा बढी भ्युज प्राप्त गरिसकेको निर्माण पक्षले जनाएको छ।

यसैगरी, ‘झिंगे दाउ’को पहिलो श्रृंखलाले युट्युबमा ८० लाखभन्दा बढी भ्युज पाइसकेको छ। पहिलो भागको प्रतिक्रियाका कारण पनि दर्शक ‘झिंगे दाउ २’प्रति उत्साहित देखिएको निर्माण पक्षको दाबी छ।