‘जलाकी’को ‘पहिलो झलक’ सार्वजनिक, उपासनाको शिक्षिकादेखि प्रेमकथासम्म

नमस्ते चितवन

शुक्रबार, असोज ०२, २०८३ मा प्रकाशित

काठमाडौं । ‘खुस्मा’ फेम्ड निर्देशक अशोक थापा मगरको दोस्रो निर्देशकीय सिनेमा ‘जलाकी’को ‘पहिलो झलक’ सार्वजनिक भएको छ। निर्माण टिमले युट्युबमार्फत सिनेमाको टिजर सार्वजनिक गरेको हो।

सार्वजनिक टिजरमा उपासना सिंह ठकुरी, सोनम तोप्देन, अस्तित्व भट्टचन र साहारा हाङमा लिम्बूलगायत मुख्य कलाकारलाई प्रस्तुत गरिएको छ। टिजरमा उपासना शिक्षिकाको भूमिकामा देखिएकी छन्। उनको बाल्यकाल, कलेज जीवनका क्रममा सोनमसँग विकसित हुने प्रेमसम्बन्ध र आमासँग जोडिएका भावनालाई समेत झलकमा समेटिएको छ।

हिमाल, पहाड, हरियाली वनजंगल र नदीका मनोरम दृश्यले टिजरलाई थप आकर्षक बनाएको छ। यसअघि सार्वजनिक ‘चाँदी जलप’ गीत र पोस्टरले दर्शकमाझ चासो बढाइरहेका बेला सार्वजनिक ‘पहिलो झलक’ले फिल्मको कथाप्रति थप कौतूहलता सिर्जना गरेको छ।

निर्देशक अशोक थापा मगरका अनुसार ‘जलाकी’ मगर समुदायमा आस्था, सम्झना र मायाको प्रतीकका रूपमा चिनिने ढुङ्गाबाट बनाइएको स्तम्भलाई जनाउने शब्द हो। यही सांस्कृतिक प्रतीकलाई केन्द्रमा राखेर मगर र गुरुङ समुदायको संस्कृति, परम्परा र भावनालाई कथामा प्रस्तुत गरिएको उनले बताएका छन्।

एम मिडिया प्रोडक्सनको ब्यानरमा निर्माण भएको ‘जलाकी’ आगामी मंसिर ४ गतेदेखि प्रदर्शनमा आउनेछ। फिल्ममा सोनम तोप्देन र उपासना सिंह ठकुरीसँगै शिल्पा मास्के, माओत्से गुरुङ, बुद्धि तामाङ, अस्तित्व भट्टचन, साहारा हाङमा लिम्बू, रजनी गुरुङ, राजु रेग्मी मगर, उषा खड्की, खड्क बहादुर पुन (खबपु), लुनिभा तुलाधर, संगीता थापा, कर्मा लामा तामाङ, भावना मगर, राज काउचा मगर र दुइसाङ थिनलगायत कलाकारको अभिनय छ।

क्याप्टेन विजय लामा विशेष भूमिकामा छन् भने मुन्जन थापा मगर, नुलाम्मा बान्तावा र रिन्सी धनहा मगर बालकलाकारका रूपमा देखिएका छन्। मिस सिक्किम साहारा हाङमा लिम्बूले यही फिल्मबाट नेपाली रजतपटमा डेब्यु गर्दैछिन्।

ओम घर्ति मगर, वीर बहादुर लामा, चन्द्र बहादुर भट्टचन, बेताने मगर (बबिता राना), मान बहादुर धनाह मगर र सुस्मिता बुढाथोकी निर्माता रहेको फिल्मलाई गोविन्द शाहीको काफिया फिल्मस् र कुवेर सिने डिष्ट्रीव्युसनले वितरण गर्नेछ।

निर्देशक थापा मगरको डेब्यु सिनेमा ‘खुस्मा’ व्यावसायिक रूपमा सफल भएको थियो। उक्त फिल्मको ‘रुकुम मैकोट’ गीत टिकटक, फेसबुक रिल्स र युट्युबलगायत सामाजिक सञ्जालमा लोकप्रिय बनेको थियो। ‘खुस्मा’पछि निर्देशक मगरको दोस्रो प्रस्तुति ‘जलाकी’प्रति पनि दर्शकको चासो देखिएको छ।