बहुप्रतीक्षित ‘छ माया छपक्कै २’को ‘मायामा एक्सपायरी डेट हुँदैन’ गीत सार्वजनिक

नमस्ते चितवन

बुधबार, असोज २१, २०८३ मा प्रकाशित

काठमाडौं, असोज २१ । यस वर्षको बहुप्रतीक्षित चलचित्र ‘छ माया छपक्कै २’मा समावेश गीत ‘मायामा एक्सपायरी डेट हुँदैन’ सार्वजनिक गरिएको छ । दशैंको फूलपाती अर्थात् असोज ३१ गतेदेखि प्रदर्शनमा आउने तयारीमा रहेको चलचित्रको उक्त गीत निर्माणपक्षले सार्वजनिक गरेको हो ।

सबिन सुबेदी र सहिमा श्रेष्ठको स्वर रहेको गीतमा राजेन्द्र थापाको शब्द तथा दीपक शर्माको संगीत छ । उदयराज पौडेलले एरेन्ज गरेको गीतको रेकर्डिङ गोविन्द अनेक र कमलले गरेका हुन् । श्यामश्वेत रसाइलीले मिक्स तथा मास्टरिङ गरेको गीत प्रिज्म स्टुडियोमा तयार गरिएको हो ।

चलचित्रमा दीपकराज गिरीलाई राजा पात्रको भूमिकामा प्रस्तुत गरिएको छ । दीपाश्री निरौला, केकी अधिकारी, सनिशा भट्टराई, प्रकाश घिमिरे, रमा थपलिया, निर्मल शर्मा, मेक्सम गौडेल, नवीन लम्साल, विष्णु सापकोटा, रविन्द्र झा, रजनी केसी, कर्मा शाक्य, रियान गिरी, सरदा गिरी, सन्तोष पौडेल, पार्वती अधिकारी र राधा लम्साललगायत कलाकारको अभिनय छ ।

आमा सरस्वती मुभिजको प्रस्तुति तथा रोहित अधिकारी फिल्म्सको निर्माणमा बनेको चलचित्रमा दीपकराज गिरीको कथा, पटकथा तथा संवाद रहेको छ । चलचित्रको निर्देशन दीपेन्द्र लामाले गरेका छन् भने दीपाश्री निरौला सल्लाहकारका रूपमा जोडिएकी छन् ।

निर्मल शर्मा र सुरज बुम ठकुरी कार्यकारी निर्माता रहेको चलचित्रको प्रोडक्सन डिजाइन धिरज चापागाईंले गरेका छन् । सुशन प्रजापति र विशाल प्रजापतिको छायांकन रहेको चलचित्रमा बिपिन मल्लको सम्पादन छ ।

चलचित्रमा किरण थापाको कोरियोग्राफी, त्सुजिल कर्माचार्यको ब्याकग्राउन्ड म्युजिक तथा मुकेश शाह र सीएएसको साउन्ड डिजाइन एवं रि–रेकर्डिङ मिक्सिङ रहेको छ । मनोज श्रेष्ठले भीएफएक्स तथा मोसन ग्राफिक्सको काम गरेका छन् ।