‘१२ गाउँ २’को ‘रेशमी रुमाल’मा विराज

काठमाडौं । अभिनेता विराज भट्टको निर्देशन तथा निर्माणमा तयार भएको चलचित्र ‘१२ गाउँ २’ प्रदर्शनको संघारमा पुगेसँगै यसको प्रचार सामग्रीले दर्शकको ध्यान तानिरहेको छ । एक्सनप्रधान टिजरबाट चर्चा बटुलेको चलचित्रले गीतमार्फत कथाको प्रेमिल र भावनात्मक पाटो पनि विस्तारै सार्वजनिक गरिरहेको छ ।

चलचित्रको प्रचार यात्रामा सार्वजनिक भएको ‘जुनेली’ पहिलो गीत थियो । सुगम पोखरेलको स्वर रहेको गीतमा समीर भट्ट र कृशु शाहीलाई प्रेमिल भावमा प्रस्तुत गरिएको थियो । गीतमा उनीहरूको नृत्यसँगै समीरको डान्स तथा ब्रेकडान्सले पनि दर्शकको ध्यान खिचेको थियो ।

त्यसपछि सार्वजनिक ‘लालीगुराँस’ले चलचित्रको प्रेमकथालाई थप उजागर गर्‍यो । एक्सनले भरिएको टिजर हेरेपछि चलचित्रमा द्वन्द्व र बदलाको कथा मात्रै रहेको हुनसक्ने अनुमान भइरहेका बेला ‘लालीगुराँस’ले समीर र कृशुको प्रेमिल जोडीलाई केन्द्रमा राख्दै चलचित्रको रोमान्टिक पक्ष पनि महत्वपूर्ण रहेको संकेत दिएको थियो ।

यही क्रमलाई अगाडि बढाउँदै बुधबार ‘रेशमी रुमाल’ सार्वजनिक गरिएको छ । गीतको भिडियोमा विराज भट्ट र वर्षा इटानीको जोडीलाई केन्द्रमा राखिएको छ । अघिल्ला प्रचार सामग्रीभन्दा फरक अनुभूति दिने प्रयास गीतमा देखिन्छ । चलचित्रलाई एक्सनप्रधान रूपमा प्रस्तुत गरिए पनि कथामा प्रेम र सम्बन्धको पाटो पनि महत्वपूर्ण रहेको संकेत गीतहरूले गरेका छन् ।

विशेषगरी ‘रेशमी रुमाल’को प्रस्तुति हेर्दा निर्माणपक्षले गीतलाई केवल प्रचार सामग्रीका रूपमा नभई कथाको भावनात्मक पक्षसँग जोड्ने प्रयास गरेको देखिन्छ । ‘जुनेली’ले समीर–कृशुको जोडीलाई दर्शकमाझ चिनाएको थियो भने ‘लालीगुराँस’ले उनीहरूको प्रेमलाई थप नजिकबाट प्रस्तुत गरेको थियो । अब ‘रेशमी रुमाल’ले विराज र वर्षाको सम्बन्धलाई थप उजागर गर्ने अपेक्षा गरिएको छ ।

‘१२ गाउँ २’को मुख्य आकर्षण भने यसको एक्सन हो । चलचित्रको टिजर सार्वजनिक हुँदा निर्माणपक्षले एक्सन, द्वन्द्व र बदलाको कथालाई प्राथमिकतामा राखेको स्पष्ट संकेत गरेको थियो । तर क्रमशः गीतहरू सार्वजनिक हुँदै जाँदा चलचित्रमा एक्सनसँगै प्रेम, भावना र पारिवारिक सम्बन्धको पाटो पनि रहेको देखिँदै गएको छ ।

यसले चलचित्रप्रतिको दर्शकको उत्सुकता थप बढाएको छ । एक्सन फिल्मको अपेक्षासहित हल पुग्ने दर्शकले त्यहाँ द्वन्द्वसँगै प्रेमकथा र भावनात्मक उतारचढाव पनि अनुभव गर्न पाउने संकेत प्रचार सामग्रीले दिएका छन् ।

चलचित्रमा विराज भट्ट, समीर भट्ट, कृशु शाही र वर्षा इटानीका अलावा अनुपविक्रम शाही, प्रकाश शाह, सुनील पोखरेल, कालु राना, खुसी कार्की, पुष्कर भट्ट, राज हमाल, प्रजल दुलाल, कमल देवकोटा, साहित सिंह ठकुरी, अर्जुन आचार्य, शिवा सिंह, नेहा आर शाह, पूर्णबहादुर गन्धर्व र सुदीर श्रेष्ठलगायत कलाकारको अभिनय छ । यही चलचित्रबाट कृशु शाही (काफिया) र वर्षा इटानीले नेपाली रजतपटमा डेब्यु गर्दैछन् ।

दशैंको अवसर पारेर असोज ३० गते प्रदर्शनमा आउन लागेको ‘१२ गाउँ २’ले नेपाली चलचित्रका लागि महत्वपूर्ण मानिने दशैंको समयमा दर्शक तान्न एक्सन, प्रेम र नयाँ पुस्ताका कलाकारलाई प्रमुख आधार बनाउने देखिन्छ । विराज भट्टसँग जोडिएको ब्रान्डसमेत चलचित्रको अर्को आकर्षण बनेको छ ।

चलचित्रमा युग भुसाल र डीपी खनालको संगीत, बन्दे प्रसादको सम्पादन, रामजी लामिछाने र सियोन श्रेष्ठको नृत्य निर्देशन तथा स्टन्ट सिल्भा र शंकर महर्जनको द्वन्द्व निर्देशन रहेको छ ।चलचित्रको वितरण काफिया फिल्मस् र कुबेर सिनेमाले गर्नेछन् ।