आज उद्घाटन भएको महोत्सव आगामी माघ ४ गतेसम्म सञ्चालन हुने उल्लेख गर्दै महोत्सव प्रवद्र्धन समिति संयोजक राजेन्द्र ओलीले महोत्सव अवधिभर विभिन्न गोष्ठी तथा सेमिनारहरु आयोजना हुने बताए । ओलीकाअनुसार कृषि, शिक्षा, स्वास्थ्य, पर्यटनलगायत जिल्लाको सामाजिक आर्थिक विकासका सम्भावनामा केन्द्रित रही पुस २९ देखि माघ ३ गतेसम्म विज्ञहरुको उपस्थितिमा दैनिक राष्ट्रिय स्तरका गोष्ठी तथा सेमिनारहरु सञ्चालन गरिनेछ । त्यसैगरी महोत्सव अन्तर्गत नै पुस २८ देखि माघ २ गतेसम्म नारायणगढको क्याम्पाचौरमा फुड फेस्टिभलको आयोजना गरिएको ओलीले बताए ।

उद्योग वाणिज्य संघ चितवनका वरिष्ठ उपाध्यक्ष एवं प्रदर्शक व्यवस्थापन समिति संयोजक सुमनकुमार श्रेष्ठले महोत्सवमा ४५० वटा स्टल रहेको बताए । महोत्सवमा सहभागी सबै स्टलहरुको बीमा गरिएको भन्दै श्रेष्ठले महोत्सव स्थलको चौबीसै घण्टा सिसिटिभी क्यामेराबाट निगरानी गरिने बताए । महोत्सवको आन्तरिक सुरक्षा व्यवस्था निजी क्षेत्रलाई जिम्मा दिइएको भन्दै श्रेष्ठले बाह्य सुरक्षाका लागि स्थानीय प्रशासनसँग सहकार्य गरिएको बताए ।

महोत्सव अवलोकनका लागि सर्वसाधारणलाई ६० तथा विद्यार्थीलाई ३० रुपैयाँको टिकट व्यवस्था गरिएको वरिष्ठ उपाध्यक्ष श्रेष्ठको भनाइ छ । दश दिनसम्म सञ्चालन हुने महोत्सवको पाँच लाख दर्शकले अवलोकन गर्ने तथा २५ करोड रुपैयाँ बराबरको आर्थिक कारोबार हुने आयोजकले अपेक्षा गरेको छ । चितवन महोत्सव उद्घाटनसँगै बागमती प्रदेशका उद्योग, वाणिज्य तथा आपूति मिलनबाबु श्रेष्ठ, उद्योग वाणिज्य महासंघका उपाध्यक्ष दिनेश श्रेष्ठसहितका अतिथिहरुले १४औँ चितवन महोत्सव स्मारिकासमेत विमोचन गरेका छन् ।