चलचित्र ‘कैदीको पत्र’ को ट्रेलर सार्वजनिक

नमस्ते चितवन

बिहिबार, चैत ३०, २०७९ मा प्रकाशित

चैत्र ३० , काठमाडौँ । वैशाख १५ गतेबाट देशभर रिलिज हुन लागेको चलचित्र हो ‘कैदीको पत्र’ । प्रदर्शन मिति नजिकिँदै गर्दा चलचित्रले ट्रेलर सार्वजनिक गरेको छ । दुई मिनेट ४७ सेकेण्डको ट्रेलरमा एक युवक, उसको वरपर सबन्धित हुने व्यक्तिहरु र प्रेम सम्बन्धमा आउने उतार चढावलाई चित्रण गरिएको छ । स्कटल्याण्डमा पुरै छायांकन भएको चलचित्रलाई सनमकुमार बैरागले निर्देशन गरेका हुन् । चलचित्रले जीवनमा पाएको खुसीलाई सम्हाल्न नसक्दा मानिसले व्यहोर्नुपर्ने उतारचढाव र भोग्नुपर्ने कठिनाइ कथाको बनाएको छ ।

चलचित्रमा कुनाल विश्व र ब्रिटिश अभिनेत्री म्याडिसन लाजारस, सलिना थापामगर, पृथ्वीराज खत्री, सुवर्ण थापा, मनिष श्रेष्ठ, सुस्मिता थापा, क्यारी डोड्स, किरण कार्की, चरण प्रधान, बिजेता श्रेष्ठ, फौस्तास तलग्का, लारेन वेस्टबरी, तपस्या शिवाकोटी लगायतका नेपाली तथा ब्रिटिश कलाकारको अभिनय छ । दिल घले, नानी बैराग, कैलाश विश्वकर्मा र हिराल जोशी निर्माता रहेको चलचित्रमा सुरेश सेन्चुरी र विनम्र कर्माचार्यको संगीत छ । चलचित्र उपत्यकामा जिजिए ग्रुप र उपत्यका बाहिर एफडी कम्पनीले वितरण गर्दैछन् ।