आस्था राउतको नयाँ भिडियो ‘लै बरि लै’ सार्वजनिक

नमस्ते चितवन

आइतबार, असोज २८, २०८० मा प्रकाशित

काठमाडौं, असोज २८ गते
‘झुम्के बुलाकी’ गायिका आस्था राउतको नयाँ भिडियो सहितको गीत सार्वजनिक भएको छ । घटस्थापनाको साइत पारेर आज गित सार्वजनिक गरेको हो । ‘लै बरि लै’ गीतमा आस्थाले आफैं मोडलिङ पनि गरेकी छन् । ‘सालको पात टपरी’ बोलको रिमिक्स गीतबाट गायन यात्रा सुरु गरेकी आस्थाले ‘चौबन्दीमा पटुकी’ बोलको गीतबाट आफूलाई स्थापित गरेकी हुन । त्यसपछि दर्जनौँ हिट गीतमा स्वर दिएकी आस्थाले नयाँ गीतलाई डान्सिङ शैलीमा तयार गरेकी छन् ।

सावित्री राउतको शब्दमा सुरेश अधिकारीले संगीत भरेको गीतले छोटो जिन्दगीमा रमाइलो गर्नुपर्ने सन्देश दिन्छ । गायिका आस्थाले गीतको भाव र चाडपर्वको मौसम एकै भएकाले गीतले दर्शक पाउने विश्वास व्यक्त गरिन् । ‘देश विदेश जताततैबाट नकारात्मक खबर आएको समयमा यस्ता गीतले हामीमा नयाँ उर्जा भरुन् भन्ने उद्देश्यले अलि रमाइलो शैलीको गीत गाएकी हुँ । यो गीत मात्र नभएर मेरा प्यारा दर्शकलाई सन्देश पनि हो’, आस्थाको भनाइ छ ।

केही गीतका भिडियोमा लिपसिङमा मात्र देखिने गरेकी आस्थाले यो गीतमा आफैं मज्जाले नाचेकी पनि छिन् । उनको नृत्य कौशलले उनी गीत र नृत्य बराबरी गर्न सक्ने पक्का पफर्मर भएको सन्देश दिन सफल भएकी छिन् । गीतको भिडिओ किरण थापाले निर्देशन गरेका हुन् । भिडिओमा राज कटुवाल, मिहाङ, प्रवेश र उपासना शाक्य, कृतिका बराल, कन्चन श्रेष्ठ, रिया सुन्दास आदिले पनि उपस्थिति देखाएका छन् ।