भ्रमण वर्ष सफल बनाउन साइक्लिङ प्रतियोगिता

नमस्ते चितवन

शनिबार, चैत १०, २०८० मा प्रकाशित

भरतपुरमा तेस्रो प्रज्ञा स्मृति साइक्लिङ प्रतियोगिता २०८० सुरु भएको छ ।

प्रज्ञा स्मृति प्रतिष्ठानको आयोजनामा शनिबार प्रज्ञा स्मृति साइक्लिङ एमटिबी क्रसकन्टी ओलम्पिक (एमटिब–एक्ससिओ) आयोजना गरिएको हो ।
भरतपुर भ्रमण वर्ष मनाउने क्रममा चितवनमा साइक्लिङ आयोजना गरिएको प्रतियोगिताका संयोजक सन्तु दराइले बताउनु भयो । भरतपुर महानगरपालिकाले सन् २०२४ लाई भरतपुर भ्रमण वर्ष घोषणा गरेको छ । यस प्रतियोगिताले भ्रमण वर्षलाई सफल बनाउन सहयोग पुग्ने दराईले बताउनुभयो ।

प्रतियोगितामा इलाइट पुरुष र महिला, पुरुष मास्टर्स (४० वर्षमाथि), जुनियर पुरुष (१७ र १८ वर्ष) तथा चितवन विषेश महिला र पुरुष विधा रहेको छ । जसमा राष्ट्रियस्तरका स्वदेशी र विदेशी गरी करीब १५० जना साइक्लिस्टले सहभागिता जनाएका छन् । यो प्रतियोगिता मलेसियामा हुने एसियन माउन्टेन बाइक च्याम्पियन्सीप २०२४ को छनोट प्रतियोगिता पनि हो ।

आयोजक संस्था प्रज्ञा स्मृति प्रतिष्ठान, प्रकाश दाहाल र ज्ञानु दाहालको नाममा स्थापित संस्था हो। प्रतियोगिताका संयोजक सन्तु दराइका अनुसार यस संस्थाले खेलकुदबाहेक अन्य विभिन्न समाजिक कार्य गरिरहेको भएपनि हाल खेलकुदमा बढी केन्द्रित छ ।