चाडपर्वमा प्रशासनको अनुमतिविना नाचगान गर्न रोक

नमस्ते चितवन

बिहिबार, भदौ ०६, २०८१ मा प्रकाशित

जिल्ला प्रहरी कार्यालय रौतहटले चाडपर्वमा प्रशासनको अनुमतिविना नाचगान गर्नरोक लगाएको छ ।

जिल्ला प्रहरी कार्यालय रौतहटको प्रवक्ता तथा सूचना अधिकारी प्रहरी नायव उपरीक्षक एलिजा गिरीले बिहीबार प्रेस नोट जारी गर्दै यस्तो जानकारी गराउनु भएको हो । अधिकार प्राप्त अधिकारी निकायको अनुमतिविना विभिन्न चाडपर्वको नाममा गाउँगाउँमा दिन र रातको समयमा अश्लीलता झल्किने किसिमका भोजपुरी गीत गाउने, लवण्डा नचाउने, आर्केस्टा नचाउने, मनोरञ्जनको नाममा जुवा जेल्नेरखेलाउने जस्ता कारण विभिन्न ठाउँमा एक आपसमा झैझगडा तथा कुटपिट गर्ने, ढुङ्गामुढा गर्ने, विभिन्न मानिसको धन सम्पत्ति क्षति हुन गएको कारण यस प्रकारको निर्णय लिइएको छ ।

धार्मिक, सांस्कृतिक, राजनैतिक आदि कुनै किसिमको नाचगान हुने वा भिडभाडजस्ता कार्यक्रम गर्दा अनिवार्य रूपमा कार्यक्रम गर्ने आयोजक पक्षले कार्यक्रम सञ्चालक समिति गठन गरी के–कस्तो कार्यक्रम गर्ने, कुन समयमा गर्ने, कुन स्थानमा गर्ने, सहभागी सङ्ख्या कति गर्ने लगायतका विषयवस्तु खुलाइ जिल्ला प्रशासन कार्यालय र सम्बन्धित निकायबाट अनुमति लिई सम्बन्धित निकायबाट तोकिए अनुसार कार्यक्रम गर्न र गराउन जिल्ला प्रहरी कार्यालय रौतहटले सूचित गराएको छ ।

तोकिएको भन्दा फरक किसिमको कार्यक्रम वा गतिविधि गरेको पाइएमा सोको जिम्मेवार आयोजक पक्ष नै हुने चेतावनी पनि प्रहरी नायव उपरीक्षक गिरीद्वारा जारी प्रेस नोटमा दिइएको छ ।