दमक, मङ्सिर ६ गते । हिउँद सुरु भएसँगै विदेशी चराका बथान झापाको मेचीनगरमा देखा पर्न शुरु गरेको छ । उत्तरी युरोपदेखि हजारौँ किलोमिटर यात्रा गर्दै आकर्षक पक्षी हुटिट्याउँको एउटा बथान मेचीनगर आइपुगेको बताइएको छ ।
समूहगत रूपमा बसोबास गर्ने, सुन्दर बनावट र अनौठो रङ्ग संयोजनका कारण विश्वकै मनमोहक प्रवासी चरामध्ये यो एक भएको चराको खोज तथा अनुसन्धानमा संलग्न फोटोग्राफर देवेन्द्र खरेल बताउनुहुन्छ ।
मेचीनगर वडा नं.४ मा चराहरुको खोजी र फोटो लिने क्रममा एकै ठाँउमा ११६ वटा हुटिट्याउँको ठूलो बथान देखिएको उहाँले जानकारी दिनुभयो ।
प्रत्येक वर्ष यो मौसममा युरोपदेखि यहाँ चराहरु आउने गरेको उहाँको भनाइ छ । उहाँले भन्नुभयो, “यसभन्दा अघि कहिलेकाहीँ सीमित सङ्ख्यामा मात्र देखिने यो प्रजाति यसपटक भने ठूलो सङ्ख्यामा यहाँ आइपुगेको छ । यो खोज र अनुसन्धानका लागि साँच्चिकै महत्वपूर्ण छ ।”
चरा खोज तथा अनुसन्धानकर्ता खरेलका अनुसार उत्तरी युरोप र साइबेरियाजस्ता मूलकबाट जाडो छल्न यी चराहरू यो मौसममा सुरक्षित स्थल खोज्दै नेपाल आइपुगेको हुनसक्ने अनुमान लगाउन सकिन्छ ।
अर्का चरा तथा पंक्षी खोजकर्तासमेत रहनुभएका फोटोग्राफर शङ्कर लुइटेलका अनुसार मेचीनगरका विभिन्न ठाउँहरु दुर्लभ चराहरुको खोज र अनुसन्धान गर्न एउटा महत्वपूर्ण स्थल बन्ने देखिएको छ ।
यसभन्दा अघि मेचीनगरमा दुर्लभ पंक्षीको प्रजातिमा पर्ने हरित परेवाको ठुलो बथान एकै ठाउँमा भेटिएको थियो । लुइटेलका अनुसार मेचीनगर चराहरुको एउटा महत्वपूर्ण हबको रुपमा विकास भएको छ ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.