दर्शकबाट उत्कृष्ट प्रतिक्रिया पाइरहेको ‘झरीपछिको इन्द्रेणी’को नयाँ गीत सार्वजनिक

काठमाडौं, पौष ०६
पौष ४ गतेबाट देशभर प्रदर्शनमा आएको नेपाली चलचित्र ‘झरीपछिको इन्द्रेणी’ले आइतबार नयाँ गीत ‘जब फर्किन्छु घर’ सार्वजनिक गरेको छ। हलमा प्रदर्शनरत चलचित्रले दर्शकबाट उत्कृष्ट प्रतिक्रिया पाइरहेका बेला निर्माण टिमले नयाँ गीत सार्वजनिक गर्दै दर्शकको आकर्षण अझै बढाउने प्रयास गरेको हो।

मनोज थापा मगरको म्युजिक एरेञ्जमेन्ट, गणेश कार्कीको शब्द रचना तथा हेमन्त रानाको स्वर रहेको गीतमा चलचित्रका मुख्य कलाकार विमोचन दवाडी, गणेश उप्रेती, सरिता गिरी, जेसिका पोखरेल तथा बाल कलाकार दिप्सन चिलवालको अभिनय देख्न सकिन्छ। निर्माण टिमले गीतले चलचित्रप्रति दर्शकको रुचि थप बढाउने विश्वास व्यक्त गरेको छ।

सिनेमाका निर्देशक अर्जुन घिमिरे ‘पाँडे’ सहित कलाकार गणेश उप्रेती, दीपाश्री निरौला, प्रियाना आचार्य ‘मुन्नी’, निर्मल शर्मा, रमेश उप्रेती, विमोचन दवाडी, जेसिका पोखरेल, बाल कलाकार दिप्सन चिलवाल तथा लेखक गणेश कार्कीले काठमाडौं उपत्यकाका विभिन्न हलमा उपस्थित भई दर्शक प्रतिक्रिया संकलन गरिरहेका छन्। दर्शकहरूले चलचित्रले नेपालको वर्तमान अवस्थालाई यथार्थ ढंगले प्रस्तुत गरेको भन्दै प्रशंसा गरिरहेका छन्।

युवा तथा खेलकुद मन्त्री बब्लु गुप्ता, काठमाडौं महानगरका मेयर बालेन शाह, महानगर प्रहरी प्रमुख राजु पाण्डे, जेनजी नेता सुदन गरुङलगायतले चलचित्र हेरिसकेका छन्। उनीहरूले सिनेमालाई सन्देशमूलक, उत्कृष्ट र हेर्नैपर्ने चलचित्रको रूपमा प्रशंसा गरेका छन्।

चलचित्रमार्फत अभिनेता गणेश उप्रेतीले नौ वर्षपछि पर्दामा कमब्याक गरेका छन्। उनका कारण अघिल्लो पुस्ताका दर्शक पनि हलमा तानिने अपेक्षा गरिएको छ। चलचित्रमा रमेश उप्रेती, प्रकाश घिमिरे, दीपाश्री निरौला तथा प्रियाना आचार्य (मुन्नी) लगायत कलाकारको अभिनय छ। साथै, एक गीतमा मोडल अञ्जली अधिकारी र कोरियोग्राफर प्रदीप लामा विशेष भूमिकामा देखिएका छन्।

निर्देशक घिमिरेकै कथामा आधारित चलचित्रबाट विमोचन दवाडी र जेसिका पोखरेलले डेब्यु गरेका छन्। जेसिका अभिनेत्री तथा निर्देशक दीपाश्री निरौलाकी बहिनीकी छोरी हुन्। बाल कलाकार दिप्सन चिलवाल पनि प्रमुख भूमिकामा छन्। पटकथा तथा संवाद गणेश कार्की र विशाल घिमिरेले लेखेका हुन् भने सिनेमाको छायांकन बुद्ध थापाले गरेका छन्।

नागराज इन्टरटेनमेन्ट प्रालीको व्यानरमा निर्माण भएको चलचित्रले नेपालको राजनीतिक अस्थिरता, त्यसले जनतामा पारेको प्रभाव, नयाँ पुस्ताको आकांक्षा र आक्रोशलाई कथावस्तु बनाएको छ। एक इमानदार कर्मचारी तथा बाबुको संघर्ष कथा पनि सिनेमामा प्रस्तुत गरिएको छ।चलचित्रका सह-निर्मातामा अनु थापा, पंकज खड्का, सिर्जना खड्का, सुवास शर्मा र राम कार्की छन् भने लाइन प्रोड्युसरमा योगेश खतिवडा र विनोद कँडेल रहेका छन्।