‘झरीपछिको इन्द्रेणी’ दोस्रो हप्तामा प्रवेश, रोजमान महर्जनको स्वरमा भजन सार्वजनिक

काठमाडौं , पौष ११ — गत पौष ४ गते बाट प्रदर्शनमा आएको नेपाली चलचित्र ‘झरीपछिको इन्द्रेणी’ आजबाट दोस्रो हप्तामा प्रवेश गरेको छ। चलचित्रले प्रदर्शनको दोस्रो हप्ता सुरु गर्दै सुपरस्टार नेवारी गायक रोजमान महर्जन को स्वरमा तयार गरिएको भजन गीत ‘धन्य धन्य लोकेश्वर’ सार्वजनिक गरेको छ।

दर्शकबाट सकारात्मक प्रतिक्रिया र उत्कृष्ट ‘वर्ड अफ माउथ’ पाइरहेको चलचित्रले दोस्रो हप्तामा पनि व्यापारिक वृद्धिको सम्भावना देखाएको निर्माण टिमको विश्वास छ। पहिलो हप्ता उत्साहजनक रहेको भन्दै डेब्यु निर्देशक अर्जुन घिमिरे ‘पाँडे’ ले दोस्रो हप्ता अझ उत्साहपूर्ण हुने अपेक्षा व्यक्त गरेका छन्। उनका अनुसार चलचित्र मनोरञ्जनसँगै सन्देशमूलक विषयवस्तु प्रस्तुत गर्ने लक्ष्यमा सफल भएको छ।

शुक्रबार सार्वजनिक गरिएको यस भजन गीतमा रोजमान महर्जनसँगै रत्न शोभा महर्जन र दीपा महर्जन को महिला स्वर समेटिएको छ। गीतको संगीत संयोजन सुरेन्द्र श्रेष्ठ ले गरेका हुन्। आध्यात्मिक भावनाले भरिएको गीतले चलचित्रको भावनात्मक पक्षलाई अझ सशक्त बनाएको छ।

यस चलचित्रमार्फत अभिनेता गणेश उप्रेती ले करिब ९ वर्षपछि दमदार कमब्याक गरेका छन्। उनको उपस्थितिले अघिल्लो पुस्ताका दर्शकलाई पुनः हलसम्म तानेको निर्माण पक्षको भनाइ छ।

चलचित्रमा गणेश उप्रेतीसँगै रमेश उप्रेती, प्रकाश घिमिरे, दीपाश्री निरौला र प्रियना आचार्य (मुन्नी) लगायत कलाकारको अभिनय रहेको छ। चलचित्रको एक गीतमा मोडेल अञ्जली अधिकारी र कोरियोग्राफर प्रदीप लामा पनि विशेष भूमिकामा देखिनेछन्।

निर्देशक घिमिरेकै कथामा बनेको यस चलचित्रबाट विमोचन दवाडी र जेसिका पोखरेल ले अभिनयमा डेब्यु गरेका छन्। डेब्यु अभिनेता विमोचनको अभिनयको दर्शकले खुलेर प्रशंसा गरिरहेको निर्माण टिमले जनाएको छ। जेसिका अभिनेत्री तथा निर्देशक दीपाश्री निरौला की बहिनीकी छोरी हुन्। चलचित्रमा बाल कलाकार दिप्सन चिलवाल को पनि अभिनय रहेको छ।

चलचित्रको पटकथा तथा संवाद गणेश कार्की र विशाल घिमिरे ले लेखेका हुन्। अनिशा सेन्दाङ लिम्बू निर्मात्री रहेको यस चलचित्रको छायांकन बुद्ध थापा ले गरेका छन्।

नागराज इन्टरटेनमेन्ट प्राली को ब्यानरमा निर्माण भएको ‘झरीपछिको इन्द्रेणी’ ले देशको राजनीतिक अस्थिरता, त्यसले जनतामा पारेको प्रभाव तथा नयाँ पुस्ताको आकांक्षा र आक्रोश लाई मुख्य कथावस्तु बनाएको छ। चलचित्रले एक इमानदार कर्मचारी र बाबुको संघर्ष को कथा पनि प्रस्तुत गर्छ।

चलचित्रमा अनु थापा, पंकज खड्का, सिर्जना खड्का, सुवास शर्मा र राम कार्की सह–निर्माताका रूपमा छन् भने योगेश खतिवडा र विनोद कँडेल लाइन प्रोड्युसर रहेका छन्।