फागुन १ बाट रिलिज हुँदै ‘कल्ली’, बलियो विषयवस्तुसहित टिजर सार्वजनिक

नमस्ते चितवन

शनिबार, पुष १२, २०८२ मा प्रकाशित

काठमाडौं , पौष १२ — फागुन १ गतेबाट प्रदर्शनमा आउन लागेको नेपाली चलचित्र ‘कल्ली’ को टिजर सार्वजनिक गरिएको छ। सार्वजनिक टिजरले बलियो मेकिङ र फरक विषयवस्तु प्रस्तुत गर्दै दर्शकमाझ उत्सुकता बढाएको छ।

किरण नेपाली को निर्माणमा तयार भएको यस चलचित्रलाई लक्ष्मण सुनार ले निर्देशन गरेका हुन्। निर्देशक सुनारकै कथामा आधारित चलचित्रको पटकथा महेश दवाडी ले लेखेका छन्।

चलचित्रमा उत्तम प्रधान, सौगात मल्ल, अर्पण थापा, बेनिशा हमाल, सुलक्षण भारती, नाजिर हुसेन, वर्षा राउत, बेगम नेपाली, विनोद न्यौपाने, रेयर राई, प्रियना आचार्य, अर्जुन गुरुङ, सन्जोक राणा, गीता अधिकारी, कुलबहादुर अधिकारी, सरस्वती खत्री र श्याम मगर मुख्य भूमिकामा देखिएका छन्। बाल कलाकारका रूपमा उपेश ढकाल, मञ्जिला बाँनिया र समर्पण खतिवडा को अभिनय रहेको छ। टिजरको अन्त्यतिर नायिका परिक्षा लिम्बु लाई सरप्राइज प्याकेजका रूपमा प्रस्तुत गरिएको छ।

निसाल पौडेल को छायांकन रहेको चलचित्रमा मिलन श्रेष्ठ को सम्पादन छ। चलचित्रमा आशिष अविरल, सरित राई र केतन क्षेत्री को संगीत रहेको छ भने एक्सन निर्देशन एन.बी. महर्जन ले गरेका हुन्। चलचित्रका निर्माण प्रमुख सुरज आचार्य हुन्।

चलचित्र ‘कल्ली’ ले भगवान् र राक्षसको प्रतीकात्मक कथा प्रस्तुत गरेको छ। मानिसको मनभित्र रहने देवता र राक्षसबीचको द्वन्द्वलाई केन्द्रमा राखिएको चलचित्रले देवताले बोकेको परिश्रम, मिहिनेत र इमानको भाव र राक्षसले प्रतिनिधित्व गर्ने लोभ, लालच र मोहबीचको संघर्षलाई देखाएको छ। मानिसले आफ्नो मनभित्रको देवतालाई दबाएर राक्षसी प्रवृत्तिलाई निम्त्याउँदा उत्पन्न हुने परिस्थितिलाई चलचित्रले प्रभावकारी रूपमा प्रस्तुत गर्ने संकेत टिजरले दिएको छ।

टिजरमा प्रयोग गरिएको ब्याकग्राउन्ड स्कोर, संवाद र दृश्य संयोजनले दर्शकलाई हलसम्म तान्न सक्ने सम्भावना देखिएको छ। लेकाली इन्टरटेन्मेन्ट र कस्तुरी प्रोडक्सन को ब्यानरमा निर्माण भएको ‘कल्ली’ फागुन १ गतेबाट देशभर प्रदर्शनमा आउने तयारीमा छ।