‘आ बाट आमा’को गीत ‘लैजा खबर ए हावा’आयो नेवारी भर्सनमा सार्वजनिक

नमस्ते चितवन

शुक्रबार, पुष २५, २०८२ मा प्रकाशित

काठमाडौँ । आगामी माघ १६ गतेदेखि प्रदर्शनमा आउन लागेको फिल्म ‘आ बाट आमा’ को चर्चित गीत ‘लैजा खबर ए हावा’ को नेवारी भर्सन सार्वजनिक गरिएको छ। निर्माण टिमले बिहीबार उक्त नेवारी संस्करणलाई ओएसआर युट्युब च्यानल मार्फत रिलिज गरेको हो।

नेवारी भर्सनको गीतमा गायक तथा कलाकार यमन श्रेष्ठ को स्वर रहेको छ। युट्युबमा अपलोड भएको केही समयमै गीतले सकारात्मक प्रतिक्रिया पाउन थालेको छ। यसअघि गायक रवि ओड को स्वरमा रहेको ओरिजिनल संस्करणलाई दर्शकले अत्यधिक रुचाएका थिए।

नेवारी भाषामा यही गीत गाउन पाउँदा आफू निकै खुसी भएको यमन श्रेष्ठले बताएका छन्। बाबुल गिरी को शब्द तथा संगीत रहेको यो गीतलाई नेवारी भाषामा वरिष्ठ कलाकार मदनकृष्ण श्रेष्ठ ले अनुवाद गरेका हुन्।

फिल्मका निर्देशक चन्द्र पन्त ले फिल्ममा नेपालीसँगै नेवारी भाषामा पनि गीत समावेश गरिएको जानकारी दिँदै दर्शक–स्रोताले मन पराउनेमा आफू विश्वस्त रहेको बताए। उनले आगामी दिनमा यो गीत अन्य भाषामा पनि रेकर्ड गर्ने योजना रहेको संकेत गरेका छन्।

आर्या इन्टरटेन्मेन्ट को प्रस्तुतिमा निर्माण भएको फिल्ममा विपना थापा र पल शाह प्रमुख भूमिकामा छन्। साथै प्रदीप रावत, उषा उप्रेती, सिम्रन पन्त, साइग्रेस पोखरेल, गजित बिष्ट र बेगम नेपाली लगायत कलाकारको पनि अभिनय रहेको छ। यतिबेला अभिनेता पल शाह, विपना थापा सहित निर्माण टिम फिल्मको व्यापक प्रचार–प्रसारमा जुटिरहेका छन्।

निर्देशक चन्द्र पन्तकै कथा तथा पटकथामा बनेको फिल्ममा संगीत कोशिस क्षेत्री, बाबुल गिरी र थानेश्वर गौतम को रहेको छ। गीतको भिडियोमा कोरियोग्राफी गम्भीर बिष्ट र दिलीप ओखेडा ले गरेका छन्।

नवराज उप्रेती को छायांकन रहेको फिल्मका संवाद अभिमन्यु निरवी द्वारा लिखित हुन्, जसमा अमर न्यौपाने, अभिमन्यु निरवी र चन्द्र पन्त को सहकार्य छ।

फिल्ममा कृष्णप्रसाद सुवेदी, ओमकार पन्त, प्रकाशजंग कुँवर, ध्रुवप्रसाद न्यौपाने र क्षितिज ढुंगाना को लगानी रहेको छ भने करण सिंह रसाली कार्यकारी निर्माता हुन्। सम्पादन मिलन श्रेष्ठ ले गरेका छन् भने ट्रेलर र टिजर साहिल खान ले निर्माण गरेका छन्।नेपालमा फिल्मको प्रदर्शन अधिकार आरआर फिल्म्स सँग रहेको छ भने डिजिटल अधिकार ओएसआर डिजिटल ले लिएको छ।