‘रमिताको पिरती’को ट्रेलर सार्वजनिक, प्रेमभन्दा फरक ‘ब्रेकअप स्टोरी’

नमस्ते चितवन

सोमबार, माघ १२, २०८२ मा प्रकाशित

काठमाडौं । निर्देशक सुदिप्ताको डेब्यु निर्देशनमा बनेको सिनेमा ‘रमिताको पिरती’ को ट्रेलर सार्वजनिक गरिएको छ। आइतबार राजधानीमा आयोजित विशेष कार्यक्रममा सार्वजनिक गरिएको ट्रेलरले प्रेम र धोकाको कथालाई केन्द्रमा राख्दै दर्शकमाझ उत्सुकता पैदा गर्न सफल देखिएको छ।

निर्देशक सुदिप्ताले ‘रमिताको पिरती’लाई परम्परागत लभस्टोरीभन्दा फरक ब्रेकअप स्टोरी का रूपमा प्रस्तुत गर्न खोजिएको बताइन्। नेपाली सिनेमामा प्रायः पुरुष पात्रको दृष्टिकोणबाट प्रेमकथा देखाइने गरेको उल्लेख गर्दै उनले यस सिनेमामा महिलाको दृष्टिकोणबाट कथा भनिएकाले दर्शकले नयाँ अनुभूति पाउने विश्वास व्यक्त गरिन्।“ब्रेकअपपछि एउटी केटीको मानसिक अवस्था, उसले भोग्ने पीडा र संघर्षलाई फरक ढङ्गले प्रस्तुत गरेका छौँ,” उनले भनिन्।

मुख्य अभिनेत्री आना शर्मा ले पात्रमा ढल्न निर्देशकसँग करिब ६ महिना तयारी गरेको बताइन्। कथावस्तुले आफूलाई गहिरो रूपमा छोएकाले लामो तयारीपछि मात्र अभिनयमा उत्रिएको उनको भनाइ छ।

यस्तै, अभिनेता धिरज मगर ले पछिल्लो समय हिरो केन्द्रित भन्दा पनि महिला पात्रमार्फत भनिने कथामा काम गर्न रुचि बढेको बताए। ‘रमिताको पिरती’ पनि त्यही सोचको निरन्तरता भएको उल्लेख गर्दै उनले दर्शकले आफूलाई फरक अवतारमा देख्न पाउने दाबी गरे।

आगामी माघ २३ गतेबाट प्रदर्शनमा आउन लागेको यो सिनेमाको केन्द्रमा रमिता पात्र छ, जसको भूमिका आना शर्माले निर्वाह गरेकी छन्। ब्रेकअप स्टोरीमा आधारित यो सिनेमाले दर्शकलाई फरक स्वाद दिने निर्देशक सुदिप्ताको विश्वास छ। यही सिनेमाबाट गायक समीर श्रेष्ठ ले अभिनेताका रूपमा डेब्यु गर्दैछन्।

सेरो फिल्म्सको प्रस्तुतिमा निर्माण भएको सिनेमामा आना शर्मा, समीर श्रेष्ठ र धिरज मगरसँगै विनय श्रेष्ठ, गौमाया गुरुङ, पशुपति राई, रेनु योगीत, गियना र थिन्ले ल्हामो लगायत कलाकारको अभिनय रहेको छ।सन्तोष लम्साल कार्यकारी निर्माता रहेको सिनेमामा आरपी प्रोडक्सन एसोसिएट निर्माता, सुवास कोइराला सह–निर्माता तथा सागर लम्साल निर्माता रहेका छन्।

सिनेमाको संगीत सुशान्त केसी, समीर श्रेष्ठ, महेश काफ्ले, अस्मिता अधिकारी र कुशल पोखरेलले दिएका छन्। छायाङ्कन शिशिर विशंखे, सम्पादन सुनिल शिवभक्ति, कलर कपिल पराजुली र कोरियोग्राफी कृतिका बराल ले गरेकी छन्।

काठमाडौं उपत्यकामा सिनेमा रिच इन्टरटेनमेन्ट र एप्पल इन्टरटेनमेन्ट ले वितरण गर्नेछन् भने उपत्यका बाहिर एफडी कम्पनी ले वितरण गर्नेछ।