‘श्री बुकुरो : द होम कलिङ’को मर्मस्पर्शी ट्रेलर सार्वजनिक

काठमाडौं — महाशिवरात्रिको अवसर पारेर आगामी फागुन १ गतेदेखि प्रदर्शन हुने तयारीमा रहेको नेपाली सिनेमा ‘श्री बुकुरो : द होम कलिङ’ को मर्मस्पर्शी ट्रेलर सार्वजनिक गरिएको छ। ग्रामीण परिवेशमा निर्माण गरिएको सिनेमाको कथावस्तुले पारिवारिक स्नेह, मिलन र नोकझोंकलाई समेट्दै दर्शकमाझ उत्साह थपेको छ।

काव्यात्मक न्यारेसन शैलीमा तयार पारिएको ट्रेलरले पात्रहरूको चाहना, अपेक्षा र द्वन्द्वलाई भावनात्मक ढंगले प्रस्तुत गरेको छ। सिनेमाकी मुख्य पात्र लक्ष्मी गिरी लाई केन्द्रमा राखिएको ट्रेलरले सानो घर (बुकुरो) बनाउने चाहना, छोराहरूको विवाह, उनीहरूको खुसी र पारिवारिक सपना चित्रण गरेको छ।

करिब ३ मिनेट ३३ सेकेन्ड लामो ट्रेलरले दर्शकलाई पात्रहरूको मनोदशा र कथाको गतिसँगै यात्रा गराउँछ। मानवीय सम्बन्धका सूक्ष्म पक्षलाई उजागर गर्ने ट्रेलरले सिनेमाको कथावस्तुबारे संक्षिप्त झलक पनि दिएको छ। निर्माण टिमका अनुसार ‘श्री बुकुरो’ विशुद्ध पारिवारिक र मनोरञ्जनात्मक सिनेमा हो।

सिनेमामा सुदीप भूपाल सिंह को लेखन तथा निर्देशन रहेको छ। यस सिनेमाबाट निर्देशक सिंह ९ वर्षपछि निर्देशनमा पुनरागमन गरेका हुन्। यसअघि उनले ‘माला’ र ‘रुद्रप्रिया’ जस्ता चर्चित सिनेमा निर्देशन गरेका थिए।

पछिल्लो समय सामाजिक–पारिवारिक कथामा आधारित सिनेमाले दर्शकको मन जितिरहेको सन्दर्भमा ‘श्री बुकुरो’ को विशुद्ध पारिवारिक कथाले पनि दर्शकको मन जित्ने विश्वास निर्देशक सिंहले व्यक्त गरेका छन्। यसअघि सार्वजनिक टिजर र पोस्टरले राम्रो प्रतिक्रिया पाइसकेको सिनेमा प्रतिको अपेक्षा ट्रेलरसँगै अझ बढेको छ।

फिल्म रेञ्ज को ब्यानरमा निर्माण भएको सिनेमामा आशीर्वाद क्षेत्री, लक्ष्मी गिरी, निकिता आचार्य, प्रतीक राज आचार्य, रोशनी कार्की, राजन इशान, दीपिका थापा, लय संग्रौला, मोहन निरौला, रामबाबु रेग्मी, रश्मी भट्ट, उत्तम केसी, गीता थापा, सपना श्रेष्ठ, आशिका शाही, दीपक कार्की र रजिना विश्वकर्मा लगायत कलाकारहरूको अभिनय रहेको छ।

सिनेमाको निर्माण रुबी सेन सिंह ले गरेकी हुन्। सुरज तामाङ र प्रवीण सिंह को कोरियोग्राफी, आईड्रिम एनिमेसन को भिएफएक्स, मनोरञ्जन श्रेष्ठ को कलर, बनिष शाह, चन्दन दत्त र परिच्छेद सेन को सम्पादन रहेको छ। छायांकन सञ्जय लामा र राजेश श्रेष्ठ ले गरेका हुन्। सिनेमाको छायांकन मुस्ताङ, बागलुङ, कास्की, दमौली, मकवानपुर र काठमाडौं मा गरिएको हो।

किशोर भट्ट, कुलदीप शर्मा र प्रेम खतिवडा सहायक निर्देशक रहेको सिनेमाका गीतमा रणजीत गजमेर, बसन्त सापकोटा र विक्रम कार्की को संगीत तथा शिव परियार, विशेष पौडेल, युक्ति बिमली, सविन सुवेदी र सन्देश पौडेल को स्वर सुन्न पाइनेछ।