‘श्री बुकुरो’को रोमान्टिक गीत ‘ए साइला दाई’ सार्वजनिक

नमस्ते चितवन

शनिबार, माघ २४, २०८२ मा प्रकाशित

काठमाडौं — आगामी फागुन १ गतेबाट देशभर प्रदर्शनमा आउन लागेको नेपाली सिनेमा ‘श्री बुकुरो : द होम कलिङ’ ले आफ्नो प्रचारलाई तीव्र बनाएको छ। पोस्टर र ट्रेलर सार्वजनिक गरिसकेको सिनेमाले शुक्रबार राजधानीमा आयोजित एक कार्यक्रमका बीच नयाँ गीत सार्वजनिक गरेको हो।

सार्वजनिक गरिएको ‘ए साइला दाई’ बोलको गीतमा बसन्त सापकोटाको शब्द तथा संगीत रहेको छ भने सविन सुवेदी र युक्ती बिमलीको स्वर सुन्न सकिन्छ। गीतको भिडियोमा सिनेमाका मुख्य कलाकारद्वय आशीर्वाद क्षेत्री र निकिता आचार्यको आकर्षक नृत्य देख्न सकिन्छ।

सुदीप भूपाल सिंहको लेखन तथा निर्देशन रहेको यो सिनेमा पारिवारिक कथावस्तुमा आधारित छ। सिनेमामा आशीर्वाद र निकितासँगै लक्ष्मी गिरी, प्रतीक राज आचार्य, रोशनी कार्की, राजन इशान, दीपिका थापा, लय संग्रौला, मोहन निरौला, रामबाबु रेग्मी, रश्मि भट्ट, उत्तम केसी, गीता थापा, सपना श्रेष्ठ, आशिका शाही, दीपक कार्की र रजिना विश्वकर्मा लगायतका कलाकारहरूको अभिनय रहेको छ।

फिल्म रेञ्जको ब्यानरमा निर्माण भएको यस सिनेमालाई रुबी सेन सिंहले निर्माण गरेकी हुन्। सिनेमामा सञ्जय लामा र राजेश श्रेष्ठको छायांकन, सुरज तामाङ र प्रवीण सिंहको कोरियोग्राफी, आईड्रिम एनिमेसनको भिएफएक्स, मनोरञ्जन श्रेष्ठको कलर ग्रेडिङ, विक्रम कार्कीको ब्याकग्राउन्ड स्कोर तथा बनिष शाह, चन्दन दत्त र परिच्छेद सेनको सम्पादन रहेको छ।

सिनेमाका गीतहरूमा रञ्जीत गजमेर र बसन्त सापकोटाको संगीत रहेको छ। पारिवारिक भावनालाई केन्द्रमा राखेर निर्माण गरिएको ‘श्री बुकुरो : द होम कलिङ’ ले दर्शकको मन जित्ने विश्वास निर्माण टिमले व्यक्त गरेको छ।