आँचल शर्माको जन्मदिनमा ‘एक मुठ्ठी बादल’को टिजर सार्वजनिक

नमस्ते चितवन

बिहिबार, चैत ०५, २०८२ मा प्रकाशित

काठमाडौं, चैत्र ०५
अभिनेत्री आँचल शर्मा को मुख्य भूमिका रहेको सिनेमा ‘एक मुठी बादल: माई सेयर अफ स्काई’को टिजर सार्वजनिक भएको छ। उनको जन्मदिनको अवसर पारेर सार्वजनिक गरिएको यो टिजरमा आँचलले आफैं वाचन गरेको ‘पोम्पोईको फूल’ कविताले भावनात्मक माहोल तयार गर्छ।

सिनेमाकी लेखक तथा निर्देशक सहारा शर्मा ले यो कविता आफ्नी हजुरआमाबाट सुनेको सम्झनामा आधारित भएको बताएकी छन्। उनी भन्छिन्—फिल्म सम्पादनका क्रममा यो कविता फेरि स्मृतिमा फर्कियो र त्यसपछि कथाको अभिन्न हिस्सा बन्यो।

टिजरमार्फत सिनेमाका मुख्य कलाकारहरूको परिचय पनि गराइएको छ। अभिनेत्री आँचलका अनुसार, यो सिनेमा उनका लागि निकै विशेष छ, किनकि यसमा उनले “माइली” पात्रमार्फत आफ्नै जीवनका अनुभूति झल्काउने अवसर पाएकी छन्।

सिनेमामा आँचलसँगै निशा शर्मा, उषा रजक, भिमा मैनाली, अस्मिता गौतम, शेखर चापागाईं, मनिष निरौला, सहयोग अधिकारी, गौरव विष्ट र अविरलप्रताप अधिकारीलगायत कलाकारको अभिनय रहेको छ।

फिल्मका निर्माता अभिमन्यु दीक्षित हुन् भने कार्यकारी निर्माता निकुन श्रेष्ठ रहेका छन्। साथै, अन्तर्राष्ट्रिय सहकार्यमा जर्मन निर्माता सारा फाजिलात पनि जोडिएकी छन्।

विशेष कुरा के छ भने, सिनेमाको अधिकांश प्राविधिक तथा सिर्जनात्मक नेतृत्व महिलाहरूले सम्हालेका छन्। गौंथली इन्टरटेनमेन्ट र मन प्रडक्सनको सहकार्यमा बनेको यो फिल्मलाई नेपालमा आरआर फिल्म्सले वितरण गर्नेछ।