सारिका घिमिरेको ‘गुन भुल्यौ–२ साइला दाइ’ सार्वजनिक

नमस्ते चितवन

सोमबार, चैत २३, २०८२ मा प्रकाशित

काठमाडौं, चैत्र २३
सारिका घिमिरेले ‘गुन भुल्यौ पित्तलको सुन पायौं होला’को अपार सफलता पछि ‘गुन भुल्यौ-२ साइला दाइ’ लिएर आउनुभएको छ । सारिकाकै शब्द, संगीत, स्वर र मनोज परियारको मिक्सिङ तथा माष्टरिङ रहेको गीतको भिडियो सार्वजनिक भएको हो । केशवराज भट्टको निर्देशन रहेको गीतको भिडियोमा करण चैसिरको छायांकन र मनोज कार्कीको सम्पादन छ ।

प्रेमविछोडको पीडा समेटिएको गीतको भिडियोमा सारिका, सौर्य तिरुवा र जेरी भण्डारीको अभिनय छ । गीत सार्वजनिक भएको छोटौ समयमै श्रोता/दर्शकको माया बटुल्न सफल भएको छ । ‘गुन भुल्यौ पित्तलको सुन पायौं होला’ले जस्तै ‘गुन भुल्यौ-२ साइला दाइ’ले पनि सबैको माया पाउनेमा आशावादी रहेको सारिका बताउनुहुन्छ । गीतमा आफूले माया गरेको मान्छे, आफूले गुन लगाएको मान्छेले भुल्दै गएको पीडा व्यक्त गरिएको छ । भुलेर जाने मायालाई सारिकाले गीतमार्फत गुनासो गर्नुएको छ ।

गायन, मोडलिङ, अभिनय र सिर्जनाको यात्रामा डेढ दशक बिताउनुभएकी सारिकाको यो गीतका टिकटक र रिल्समा पनि निक्कै भिडियो बनिरहेका छन् । गीतको भिडियो सारिकको अफिसियल युट्युब च्यानलमार्फत सार्वजनिक गरिएको हो ।

नायिका तथा गायिका सारिकाले पछिल्लो समय गायनमार्फत चर्चा बटुल्न सफल हुनुभएको छ । नेपाली चलचित्र क्षेत्रमा आफ्नो राम्रो पहिचान बनाउनुभएकी सारिका यतिबेला गायिकाका रूपमा आफ्नो पहिचानलाई अग्ल्याउनु भएको छ । एक दर्जनभन्दा बढी चलचित्रमा अभियन गर्नुभएकी उहाँ तीन दर्जन जति गीतका भिडियोमा पनि देखिनुभएको छ । पछिल्लो समय गायिकाका रूपमा ख्याति कमाउँदै जानुभएकी घिमिरेका केही गीत करोडौं क्लबमा पनि पर्न सफल भएका छन् ।