नेपालले अमेरिकालाई दियो ३१८ रनको चुनौती

नमस्ते चितवन

शुक्रबार, जेठ ०८, २०८३ मा प्रकाशित

आईसीसी लिग–२ अन्तर्गत शुक्रबार जारी खेलमा नेपालले अमेरिकालाई ३१८ रनको चुनौती दिएको छ ।

कीर्तिपुरस्थिति त्रिवि मैदानमा टस जितेर पहिला बलिङ गरेको अमेरिकाविरुद्ध नेपालले पूरै ५० ओभर खेल्दै आठ विकेटको क्षतिमा ३१७ रन बनाएको हो ।

नेपालका लागि उपकप्तान दीपेन्द्रसिंह ऐरी र इशान पाण्डेले अर्धशतक बनाउनुभयो । दीपेन्द्रले ३६ बलको सामना गर्दै चार चाैका र चार छक्काको मद्दतमा ५९ रन बनाउनुभयो । अन्तिमक्रममा विष्फोटक ब्याटिङ गर्नुभएका ऐरी रनआउट हुनुभएको हो । तेस्रो क्रममा ब्याटिङ गर्नुभएका इशान पाण्डेले ८४ बलको सामना गर्दै आठ चौका र एक छक्काको मद्दतमा ८४ रनको अर्धशतकीय इनिङ खेल्नुभयो ।

कप्तान रोहितकुमार पौडेलले ४६ रन बनाउनुभयो भने ओपनर आशिफ शेखले ४३ रन बनाउनुभयो । ओपनर कुशल भुर्तेलले २९ रन जोड्नु भएको खेलमा गुल्सन झा १५ रनमा आउट हुनुभयो । आरिफ शेखले नटआउट १८ रन बनाउनुभयो भने सोमपाल कामीले चार रन जोड्दा नन्दन यादव एक रनमा आउट हुनुभयो ।

नेपाललाई सस्तैमा समेट्न अमेरिकाका लागि शुभम रञ्जनेले तीन विकेट हात पर्नुभयो भने रुसिल उगारकर र मिलन्दु कुमारले एकएक विकेट हात पर्नुभयो ।

अहिले केही बेरमा अमेरिकाले जवाफी ब्याटिङ गर्ने छ । लिग–२ को तालिकामा अमेरिका ३८ अंकसहित शीर्ष स्थानमा छ भने समान खेल खेलेको नेपाल २२ अंकसहित पाँचौ स्थानमा छ । नेपालमाथि आजको खेल जित्नैपर्ने दबाब छ ।