‘लालीबजार’को व्यापार उत्साहजनक, आमा–छोरीको कथामा बनेको ‘साहारा तिमी छौं’ सार्वजनिक

नमस्ते चितवन

बुधबार, जेठ १३, २०८३ मा प्रकाशित

काठमाडौं । वैशाख २५ गतेदेखि प्रदर्शनमा आएको नेपाली चलचित्र ‘लालीबजार’ले बक्सअफिसमा उत्साहजनक व्यापार गरिरहेको छ। निर्माण टिमका अनुसार चलचित्रले गत शनिबारसम्म ५ करोड ७६ लाख रुपैयाँभन्दा बढी कमाइसकेको छ भने यो साता ८ करोड नजिक पुग्ने अपेक्षा गरिएको छ।

बक्सअफिसमा राम्रो प्रदर्शन गरिरहेको यस चलचित्रको निर्माण टिमले यसैबीच आमा र छोरीप्रतिको सम्मानस्वरूप ‘साहारा तिमी छौं’ गीतको भिडियो सार्वजनिक गरेको छ। यसअघि लिरिकल भर्सनमार्फत रुचाइएको गीतको भिडियोले पनि दर्शकको मन जित्ने विश्वास निर्माण कम्पनी षट्कोण आर्ट्सले व्यक्त गरेको छ।

आमा र छोरीबीचको भावनात्मक सम्बन्ध तथा संघर्षलाई केन्द्रमा राखेर तयार गरिएको गीतमा अभिनेत्री स्वस्तिमा खड्का, समाइरा थापा र प्रशंसा सुवेदीलगायत कलाकार फिचर्ड छन्। गीतले चलचित्रको मूल कथावस्तुलाई समेत झल्काउने प्रयास गरेको निर्माण टिमले जनाएको छ।

गीतमा जयन जे वाइवाको शब्द तथा संगीत रहेको छ भने समीक्षा अधिकारी को स्वर सुन्न सकिन्छ। साथै दिलिजा रुवाली, अलिशा शर्मा र पूर्णिमा तामाङ बाल गायनमा छन् भने गुराँस ठकुरी र गायत्री राना मगरले कोरसमा साथ दिएका छन्। गीतमा छोरीप्रतिको आमाको माया, त्याग र हुर्काउने क्रममा भोग्नुपरेका संघर्षलाई मार्मिक ढंगले प्रस्तुत गरिएको छ।

बर्दियाको राजापुरमा छायांकन गरिएको चलचित्रमा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, प्रेम पाण्डे, आशा पौडेल, गोविन्द सुनार, आभा अर्याल, तारा शर्मा, रमेश वादी लगायत कलाकारको अभिनय रहेको छ। यही चलचित्रमार्फत विशाल देवकोटा र प्रशंसा सुवेदीले अभिनयमा डेब्यु गरेका हुन्।

यम थापा निर्देशित चलचित्रको पटकथा तथा संवाद निर्देशक थापा र प्रदीप भट्टराई ले संयुक्त रूपमा तयार गरेका हुन्। चलचित्रका कार्यकारी निर्माता प्रदीप भट्टराई हुन् भने निर्माता म्याक्स दीपेश खत्री र रवीन्द्रसिंह बानियाँ रहेका छन्।

चलचित्रमा जेबी रुवालीको क्रिएटिभ निर्देशन, सम्राट बस्नेतको द्वन्द्व निर्देशन, सुशन प्रजापतीको छायांकन, मित्रदेव गुरुङको सम्पादन तथा रोहित शाक्य र शैलेश श्रेष्ठको ब्याकग्राउन्ड म्युजिक रहेको छ। संगीततर्फ प्रकाश सपुत, खेम सेन्चुरी र जयन जे वाइवाले काम गरेका छन्।