असार १२ मा आउँदै ‘जाँड’, ट्रेलरले उठायो समाजका गम्भीर प्रश्न

नमस्ते चितवन

बुधबार, जेठ २७, २०८३ मा प्रकाशित

काठमाडौं, जेठ २७
आगामी असार १२ गतेदेखि देशभर प्रदर्शनमा आउन लागेको नेपाली चलचित्र जाँड को ट्रेलर सार्वजनिक गरिएको छ। मंगलबार काठमाडौंमा आयोजित कार्यक्रममा ट्रेलर सार्वजनिक गर्दै निर्माण टिमले चलचित्रले समाजमा जरा गाडेर बसेका कुसंस्कार, विकृति र सामाजिक विभेदविरुद्ध सशक्त सन्देश दिने जनाएको छ।

राजु शाह को निर्देशनमा निर्माण भएको चलचित्रको ट्रेलरले मद्यपानका कारण परिवारमा उत्पन्न हुने तनाव, कलह र त्यसले समाजमा पार्ने नकारात्मक असरलाई केन्द्रमा राखेको छ। जाँडको लतले परिवारभित्र निम्त्याउने समस्या, पत्नी र छोरीमाथि पर्ने प्रभाव तथा समाजले हेर्ने दृष्टिकोणलाई ट्रेलरमा यथार्थपरक ढंगले प्रस्तुत गरिएको छ।

चलचित्रले मद्यपानको दुष्प्रभाव मात्र होइन, नेपाली समाजमा अझै विद्यमान ‘वंश धान्न छोरा नै चाहिन्छ’ भन्ने सोचमाथि पनि प्रश्न उठाएको छ। छोराप्रतिको मोह र छोरीमाथि हुने विभेदका कारण परिवार तथा समाजमा सिर्जित समस्यालाई कथाको मुख्य आधार बनाइएको निर्माण पक्षको भनाइ छ।

राजेन्द्र भट्ट को निर्माण रहेको चलचित्रमा सानबी खतिवडा, पदम गुरुङ, कमला दाहाल, रमेश उप्रेती, मञ्जु श्रेष्ठ, सुवास गजुरेल, रमेश अधिकारी, लक्ष्मी तिमिल्सेना, स्मारिका खनाल र किरणप्रताप केसी लगायतका कलाकारको अभिनय रहेको छ।

सुकुलढोका मिडिया प्रालिको ब्यानरमा निर्माण गरिएको चलचित्रको कथा, पटकथा तथा संवाद सुनिलप्रसाद श्रेष्ठ, राजु शाह र राजेन्द्र भट्टले संयुक्त रूपमा तयार गरेका हुन्। चलचित्रका निर्मातामा सुनिलप्रसाद श्रेष्ठ र राजेन्द्र शाह रहेका छन्।

दिपेन बस्न्यातको छायांकन तथा सम्पादन रहेको चलचित्रमा योगेन्द्र श्रेष्ठको द्वन्द्व निर्देशन छ। चलचित्रमा श्रीपुरुष ढकालका शब्द तथा रोशन बालुवाको संगीत र स्वर समावेश गरिएको छ।

सामाजिक यथार्थ, पारिवारिक संवेदना र चेतनामूलक सन्देश बोकेको ‘जाँड’ ले मद्यपानको दुष्प्रभाव र लैंगिक विभेदजस्ता संवेदनशील विषयलाई उठान गर्दै दर्शकमाझ फरक स्वादको कथा प्रस्तुत गर्ने अपेक्षा गरिएको छ। चलचित्रको ट्रेलर ओभिएज डिजिटल इन्टरटेनमेन्टको युट्युब च्यानलमार्फत सार्वजनिक गरिएको हो भने वितरणको जिम्मा नेशनल सिने ग्रुप नेपालले लिएको छ।