चितवन । भरतपुर महानगरपालिका–१० स्थित लर्ड्स बिजनेस कम्प्लेक्स होटललाई जिल्ला प्रशासन कार्यालय चितवनले ३ लाख रुपैयाँ जरिवाना गरेको छ। खाद्य गुणस्तरसम्बन्धी गम्भीर कमजोरी फेला परेपछि प्रशासनले उक्त कारबाही गरेको हो।
गृहमन्त्री सुधन गुरुङले होटलमा खाएको अमलेटमा माछाको काँडा भेटिएको घटनापछि उपभोक्ताबाट समेत गुनासो आएपछि सहायक प्रमुख जिल्ला अधिकारीको नेतृत्वमा होटलमा आकस्मिक अनुगमन गरिएको थियो।
अनुगमनका क्रममा होटलले गुणस्तरहीन खाने तेल प्रयोग गरेको, खाद्य सामग्रीको उचित व्यवस्थापन नगरेको तथा उपभोक्ताको स्वास्थ्यमा असर पुग्ने खालका वस्तु प्रयोग गरेको पाइएको जिल्ला प्रशासन कार्यालयले जनाएको छ।
प्रशासकीय अधिकृत मदन लामा थिङका अनुसार होटलको गतिविधि उपभोक्ता संरक्षण ऐन, २०७५ को दफा १६ र ३८ विपरीत देखिएकाले सोही ऐनको दफा ३९(१)(ख) अनुसार ३ लाख रुपैयाँ जरिवाना गरिएको हो।
थिङले अमलेटमा माछाको काँडा भेटिएको घटनासँग जोडिएको होटललाई नै कारबाही गरिएको पुष्टि गर्दै उपभोक्ताको स्वास्थ्यमा खेलबाड गर्नेलाई कानुनअनुसार कारबाही गरिने बताए।
प्रशासनले होटलबाट बरामद भएका अखाद्य तथा गुणस्तरहीन खाद्य सामग्री नष्ट गर्न निर्देशन दिएको छ। साथै, सबै होटल तथा रेस्टुरेन्ट व्यवसायीलाई खाद्य सुरक्षाका मापदण्ड कडाइका साथ पालना गर्न चेतावनीसमेत दिएको छ।
राष्ट्रिय स्वतन्त्र पार्टी (रास्वपा) को महाधिवेशन भरतपुरमा जारी रहेका बेला प्रशासनले होटल तथा रेस्टुरेन्टहरूको खाद्य गुणस्तरमाथि निगरानी र अनुगमनलाई थप तीव्र बनाएको जनाएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.