बालेन प्रस्तावक बनेपछि रवि लामिछाने निर्विरोध सभापति

नमस्ते चितवन

मङ्गलबार, असार ०९, २०८३ मा प्रकाशित

चितवन । राष्ट्रिय स्वतन्त्र पार्टी (रास्वपा) को सभापति पदमा रवि लामिछाने निर्विरोध निर्वाचित भएका छन्। सभापति पदका लागि उनको मात्रै उम्मेदवारी परेपछि उनी प्रतिस्पर्धाविनै नेतृत्वमा चयन भएका हुन्।

रास्वपाको केन्द्रीय निर्वाचन आयोगका उपप्रमुख राम गुरुङले सभापति पदमा लामिछानेको मात्र मनोनयन दर्ता भएकाले उनी निर्विरोध निर्वाचित भएको जानकारी दिए।

लामिछानेले आफ्नो उम्मेदवारी दर्ता गर्दा वरिष्ठ नेता बालेन शाहलाई प्रस्तावक राखेका थिए। उम्मेदवारी दर्तापछि रवि र बालेन निर्वाचन आयोग सचिवालयको बरन्डामा सँगै उपस्थित भएका थिए।

त्यसक्रममा दुवैले उपस्थित नेता–कार्यकर्ता र समर्थकलाई अभिवादन गर्दै हात हल्लाएका थिए। रवि र बालेनको संयुक्त उपस्थितिले महाधिवेशनस्थलमा विशेष उत्साह र चर्चा थपेको थियो।