काठमाडौं । आगामी भदौ १२ गतेदेखि प्रदर्शनमा आउन लागेको नेपाली चलचित्र **‘पार्वती’**ले प्रचारप्रसारलाई तीव्र बनाउने क्रममा पहिलो रत्यौली गीत ‘नौतुना रेलैमा’ सार्वजनिक गरेको छ। निर्माण टिमले शुक्रबार ओएसआर डिजिटलको युट्युब च्यानलमार्फत गीत रिलिज गरेको हो।
सार्वजनिक गीतले नेपाली विवाह संस्कृतिमा महिलाहरूले खेल्ने रत्यौलीको मौलिक स्वादलाई जीवन्त रूपमा प्रस्तुत गरेको छ। भिडियोमा नीता ढुङ्गाना, दीपाश्री निरौला, अञ्जली अधिकारी, सिरु विष्ट, बसुन्धरा भुसाल, आशा पौडेल, अशोक दर्जी र क्रिमसन श्रेष्ठको आकर्षक नृत्य देख्न सकिन्छ।
गीतको भिडियोमा दीपाश्री निरौला पुरुषको भेषमा देखिएकी छन् भने नीता ढुङ्गाना परम्परागत महिलाको पहिरनमा प्रस्तुत भएकी छन्। उनीहरूबीचको रमाइलो अभिनय, ठट्टा र नृत्यले रत्यौलीको वास्तविक वातावरणलाई पर्दामा उतारेको छ।
‘नौतुना रेलैमा’मा रचना रिमाल, सरु गौतम र सहिमा श्रेष्ठको स्वर रहेको छ। गीतका शब्द हर्क साउदले सिर्जना गरेका हुन् भने संगीत दीपक शर्माको रहेको छ। संगीत संयोजन, मिक्सिङ र मास्टरिङ नरेन्द्र वियोगीले गरेका छन् भने नृत्य निर्देशन रामजी लामिछानेको छ।
चलचित्र ‘पार्वती’ अभिनेत्री नीता ढुङ्गानाको कथा तथा निर्देशनमा तयार भएको हो। उनी स्वयं चलचित्रको मुख्य भूमिकामा देखिनेछिन्। चलचित्रमा दीपाश्री निरौला, अशोक दर्जी, सिरु विष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेललगायत कलाकारको अभिनय रहेको छ।
चलचित्रको कथा र पटकथा नीता ढुङ्गानाकै हो भने स्क्रिनप्ले शिवम् अधिकारीले लेखेका छन्। सुदीप बरालको छायांकन रहेको चलचित्रमा नृत्य निर्देशन रामजी लामिछानेले गरेका छन्।
चलचित्रका शंकर पाण्डे प्रोडक्सन म्यानेजर तथा कार्यकारी निर्माता हुन् भने हरिहर अधिकारी निर्माता रहेका छन्। सम्पादन तथा टिजर–ट्रेलर साहिल खानले तयार पारिरहेका छन्। रोयल भीमसेनले पोस्टर डिजाइन गरेको चलचित्रको वितरण एफडी कम्पनी, एप्पल इन्टरटेनमेन्ट र रिच इन्टरटेनमेन्टले गर्नेछन्। चलचित्रको डिजिटल अधिकार ओएसआर डिजिटलसँग सुरक्षित रहेको छ।
नेपाली मौलिक संस्कृति, पारिवारिक सम्बन्ध र भावनालाई केन्द्रमा राखेर निर्माण गरिएको ‘पार्वती’ले रत्यौली गीतमार्फत दर्शकमाझ सकारात्मक उत्साह सिर्जना गर्ने अपेक्षा निर्माण पक्षले गरेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.