सरोज खनालले ‘बगान’ फिल्म निर्देशन गर्दै ,आकाश श्रेष्ठ र प्रमिला कार्की मुख्य भूमिकामा

नमस्ते चितवन

आइतबार, जेठ २२, २०७९ मा प्रकाशित

जेठ २२ , काठमाडाैं ।आइतवार चलचित्र विकास बोर्डमा आयोजित एक कार्यक्रमका बीच ‘बगान’फिल्म निर्माणको घोषणा गरियो । फिल्म ‘बगान’ अभिनेता सरोज खनालले निर्देशन गर्ने भएका छन् । खनालले यसै फिल्मबाट निर्देशनमा डेब्यू गर्न लागेका हुन् ।

फिल्ममा रहने एक गीत ‘तिम्रो सुन्दर आँखा’ समेत कार्यक्रममा सार्वजनिक गरिएको थियो । जसमा सुरेश वाग्लेको शब्द, सुभाष भुसालको संगीत र सुगम पोखरेल र अस्मिता अधिकारीले स्वर छ । रोमान्टिक थिममा तयार गीतको भिडियोमा आकाश श्रेष्ठ र प्रमिला कार्कीको अभिनय छ ।

फिल्ममा सरोज खनाल आफै पनि मुख्य कलाकारको रुपमा रहनेछन् । उनको अलवा नीर शाह, वसुन्धरा भुषाल, मिथिला शर्मा, करिश्मा मानन्धर, आकाश श्रेष्ठ, नव अभिनेत्री प्रमिला कार्कीको फिल्ममा अभिनय रहनेछ । गीतलाई फिल्ममा कथा वाचनको रुपमा प्रयोग गरिएको निर्देशक खनालले बताए । ‘मैले अहिलेसम्म अभिनयबाट सिकेको र जानेको ज्ञान र अनुभव यो फिल्म निर्देशनमा प्रयोग गर्छु’ निर्देशक खनालले भने ।

कार्यक्रममा अभिनेता आकाश श्रेष्ठले सरोज खनाल जस्तो दिग्गज कलाकारको निर्देशनमा काम गर्न पाउनु आफ्नो सौभाग्य भएको बताए । त्यस्तै नव अभिनेत्री प्रमिला कार्कीले मुर्धन्य कलाकारहरूसँग काम गर्ने अवसर मिलेकोमा खुशी व्यक्त गरिन् ।

फिल्मका निर्माता सुरेश वाग्ले हुन् । गौरीशंकर धुजु, उत्सव दाहालको छायाङ्कन, अर्जुन जिसी, राजेश शाह र सन्देश शाहको सम्पादन, समिर मियाँको भि.एफ.एक्क फिल्ममा रहनेछ । नेपाली वेभसाइट डट कमको प्रस्तुति रहेको ‘बगान’की कार्यकारी निर्माता अभिनेत्री करिश्मा मानन्धर हुन् । नेपालअघि नेपालीको बसोबास रहने विभिन्न देशहरुमा फिल्म प्रदर्शन गर्ने योजनामा निर्माण टिम छ ।