चितवनमा ध्रुवे हात्तीको आक्रमणमा आमा–छोराको मृत्युपछि स्थानीय आन्दोलित

नमस्ते चितवन

आइतबार, असार २१, २०८३ मा प्रकाशित

चितवन । चितवन राष्ट्रिय निकुञ्जबाट गाउँ पसेको जङ्गली हात्ती ‘ध्रुवे’को आक्रमणमा भरतपुर महानगरपालिका–२३, बेलहट्टा, जगतपुरकी २३ वर्षीया आशिका बोटे र उनका ४ वर्षीय छोराको शनिबार राति ज्यान गएको छ।

घटनापछि स्थानीयवासी आन्दोलित बनेका छन्। उनीहरूले मृतक आमा–छोराको शव राप्ती नदीमाथिको कसरा प्रवेश पुलमा राखेर धर्ना सुरु गरेका छन्। ‘ध्रुवे’ हात्तीलाई नियन्त्रणमा नलिएसम्म शव नउठाउने चेतावनी पनि दिएका छन्।

स्थानीयका अनुसार ‘ध्रुवे’ लामो समयदेखि गाउँ पसेर बस्तीमा आतंक मच्चाउँदै आएको थियो। पटक–पटक चितवन राष्ट्रिय निकुञ्ज प्रशासनलाई हात्ती नियन्त्रणका लागि आग्रह गरिए पनि बेवास्ता गरिएको उनीहरूको आरोप छ।

समयमै प्रभावकारी कदम नचालिँदा आमा र नाबालक छोराले ज्यान गुमाउनुपरेको भन्दै स्थानीयले सम्बन्धित निकायको गम्भीर लापरवाही भएको आरोप लगाएका छन्। उनीहरूले हात्तीलाई तत्काल नियन्त्रणमा लिन, पीडित परिवारलाई उचित राहत तथा क्षतिपूर्ति उपलब्ध गराउन र मानव–वन्यजन्तु द्वन्द्व न्यूनीकरणका लागि दीर्घकालीन उपाय अपनाउन माग गरेका छन्।