‘हली’को भावुक गीत ‘कहाँबाट ल्याऊँ बाबा पीडा भुल्ने मुटु’ सार्वजनिक

नमस्ते चितवन

शुक्रबार, साउन ०१, २०८३ मा प्रकाशित

काठमाडौं । आगामी साउन २२ गतेदेखि देशभर प्रदर्शनमा आउन लागेको नेपाली चलचित्र ‘हली’को नयाँ भावुक गीत ‘कहाँबाट ल्याऊँ बाबा पीडा भुल्ने मुटु’ सार्वजनिक गरिएको छ। बुबा–सन्तानबीचको भावनात्मक सम्बन्धलाई केन्द्रमा राखेर तयार गरिएको गीतले दर्शकको मन छुने अपेक्षा गरिएको निर्माण पक्षले जनाएको छ।

गीतका शब्द चलचित्रका मुख्य कलाकार प्रमोद दीपले लेखेका हुन् भने अभि सुनारको संगीत रहेको छ। गीतलाई चर्चित गायिका अस्मिता अधिकारीले स्वर दिएकी छन्। गीतको भिडियोमा चलचित्रका कलाकारहरूको भावपूर्ण अभिनय देख्न सकिन्छ।

जापुरा फिल्मस् प्रोडक्सन र शुभ चिरायु फिल्मस्को सहकार्यमा निर्माण भएको चलचित्रका निर्माता पूजा गुरुङ र जश्मिन श्रेष्ठ हुन्। चलचित्रको कथा, पटकथा तथा निर्देशन ओम प्रतीकले गरेका छन्।

चलचित्रमा प्रमोद दीप, सुजाता थापा, सरोज खनाल, विद्या कार्की, अरुणा कार्की, अर्जुन गुरुङ, नवीन श्रेष्ठ, कञ्चन दुलाल, कमल गाउँले र विशाल पहाडीको अभिनय रहेको छ। निर्देशक ओम प्रतीक स्वयं पनि चलचित्रको महत्वपूर्ण भूमिकामा देखिनेछन्।

यसअघि सार्वजनिक गरिएको चलचित्रको प्रमोसनल गीतमा दीपाश्री निरौला, पूजा शर्मा र मिथिला शर्मालगायत कलाकारको आकर्षक प्रस्तुति दर्शकमाझ लोकप्रिय बनेको थियो। निर्माण पक्षले नयाँ गीतले पनि चलचित्रप्रतिको उत्साह थप बढाउने विश्वास व्यक्त गरेको छ।

समाज परिवर्तनका लागि एक जना ‘हली’को भूमिका पनि पर्याप्त हुन सक्छ भन्ने सशक्त सन्देश बोकेको चलचित्रमा शम्भुजित बास्कोटा, बाबुल गिरी र कृष्ण भारद्वाजको संगीत रहेको छ।

चलचित्रका कार्यकारी निर्माता अर्जुन भुसाल, सह–निर्मात्री नम्रता भण्डारी, लाइन प्रोड्युसर लक्ष्मण कर्माचार्य तथा मुख्य सहायक निर्देशक जीवननाथ गौतम हुन्। राहुल राईको छायांकन, रामप्रसाद चौधरी र विपिन मल्लको सम्पादन तथा कुमार महर्जनको द्वन्द्व निर्देशन रहेको चलचित्रलाई नेसनल सिने ग्रुप प्रालिले देशव्यापी वितरण गर्दैछ। यसको डिजिटल पार्टनर ओएसआर डिजिटल रहेको छ।

देशभित्र र विदेशमा समेत चलचित्रलाई लिएर बढ्दो चासोका बीच ‘हली’ले प्रदर्शनपछि दर्शकबाट राम्रो प्रतिक्रिया र व्यापारिक सफलता हासिल गर्ने निर्माण पक्षको विश्वास छ।